А. Къапиевлул цIанийсса Лакрал паччахIлугърал музыкалул ва драмалул театрданул сахIналий лавайсса даражалий хьунни Да­гъусттаннал жагьилсса драматург

Марат Шахмановлул «Валкирийл аьратталшиву» пьесалийнусса «ДакI дачIаву» («Исповедь») тIисса спектакльданул премьера. Му бивхьунни терроризмалул идеологиялийн къаршисса программалул лагрулий.

---

Зулайхат Тахакьаева
Режиссер-постановщик – Аьра­сатнал Федерациялул магьирлугърал лайкь хьусса ишккакку Скандарбек Тулпаров. Режиссер – МахIаммад Сурхатилов. Художник-постановщик – Ибрагьим-Халил Супиянов. Костюмру – Ххадижат Аьлишева.
Премьералийн бувкIун бия Дагъусттан Республикалул БакIчинал маслихIатчи, Аьрасатнал АТК-лул (Антитеррористическая комиссия) экспертътурал советрал член Камил Ланда, ДР-лул БакIчинал кумагчи, АТК-лул аппаратрал вакил АхIмад Рустамов, Культуралул ва Печатьрал министерстварттал, творчествалул союзирттал вакилтал, Дагъусттаннал театрдал директортал, режиссертал ва актертал, журналистал. Вай бакъасса, залдануву бия 350-ннийн бивсса тамашачитал – Дагъусттаннал паччахIлугърал политехколледжрал студентътал ва МахIачкъала шагьрулул школарттал лавайми классирттал дуклаки оьрчIру.

Пьесалувусса ишру хъанай бур ларгмур ттуршукулул 30-ку шиннардий Германнал Нижняя Саксония шагьрулий. Амма шиву гьаз дурсса темалул агьамшиву хIакьинусса кьинигу хъуннасса дур. Западрай, Украиннай, Аьрасатнал шагьрурдай хIасул хъанай дур неофашистурал ва экстремистурал ккуранну. Лапра гъансса дур ва тема Дагъусттаннан. Кьунияхъайсса шиннардил лажиндарай жула республикалул чIярусса щархъавугу чансса хIасул хьуну бакъая экстремистурал кюртти. ХIакьинусса кьинигу марцI бу­ккавай бакъару миннацIа. Цуксса гужлан дулларчагу миннащалсса талатаву, бурувччунугу бакъару. Аькьлу-кIулшигу, хасиятгу цалий дацIан дурасса чIаважагьилтал, къалпсса идеологиялул хъяврин буллай, бигьану кIункIу хъанай бур цала оьрмулун нигьачIисса ккураннавун. «На бюхттулсса Германнал цIаний жан дулун хIадурсса талаталара! На хьхьичIавасса германнал нартътурал наслулия­ссара… На талан наниссара!» – леххаву тIий ур спектакльданувусса чIаважагьил.

Гитлер-Югендлул фашист­сса политикалул чул бувгьу­сса ккураннал каялувчитурал оьвчавур­ттал къазразан ув­сса чIаважагьил вичIидихьлай ­акъар, ялун нанимур чIалай, ганал бучIантIимунил буруккинттарайсса я ссурваврах, я ни­ттих. «Лараймур расалия­сса» къакрурдал гьалак уккан ув­сса Арманнуйн бакIрайн багьлай бур исвагьисса, дакIгу, пикрирдугу аьчухсса Идан. Ганих эшкьи хьуну, вичIидихьлай ур ганил пикрирдах. Ганищалсса бястлийсса хавардаву Арманнул пикрирду аьч хъанай бур. Амма цува аьйкьлай ивкIшиву ганан бувчIлай бур, гьалмахтурал «дуниял кIунттихьхьун ласаврия­сса» цIусса планная баяйхту. Гайннащал руцан дансса хIарачатругу чулийн къабуклай бур. Хаин хьума хIисаврай, Арман гьалмахтурал ивкIлай ур.
Жагьилсса нярал лаласун, дакIнил духIан захIматсса темалух къабурувгун, тамашачитал хъинну личIлулну вичIи дирхьуну бия.
Спектакльдануву, хъун­мур­чIин, гьурттуну бия жагьилсса актертал. Агьамми роллу дургьуну бия Луиза Шагьдилова, Ислам МахIаммадов, Зинаида Чавтараева, Мариян Шихамирова, Жаннат Гянжиева ва цаймигу.
Спектакль кIилчин ккаккан бантIий бур ва зурул 17-нний.