Дагъусттаннал «Единая Дежурно-диспетчерская служба» тIисса идара бур Ккуллал райондалийгу. Уттигъанну на хьунаавкьура ва къуллугърал зузала Рашидов МахIаммадлущал. Ванал ттухь бувсмур бия укунсса.

ХIажимурад ХIусайнов
— Ккуллал райондалий на зузисса къуллугъ багьайссар Да­гъусттаннал цасса диспетчершиврий гузат байсса къуллугърайн. Жул агьаммур давуну хъанахъиссар, аьмсса 112 номерданий жуйнма оьвкусса апатI, зарал, авария, цIу дагьаву, цамур тIабиаьтрал биян бувсса заралданухьхьун иривманачIан кумагращал гьан багьлагьисса къуллу­гъирттайн анаварну баян баву. Жу зий буссару 24 ссятрай. ЖучIан 112 номерданий занг дагьайхту, жу буржлувссару хьусса иширая баян буван анаварсса медициналул кумаграйн, полициялийн, прокуратуралийн, цIу лещан дувултрайн, кIанттул бакIчинайн, райондалул бакIчинайн. Занг ча дуркIун дурив кIул шайхту, жун бувчIайссар гиккун цалчин анаварну цумур къуллугъ гьан бан багьлай буссарив.

Жу гьантлул дянив мукьийлва буккайссару МахIачкъалалущал видеосвязрайн — кIюрххил ссят 6-нний, яла 9-нний, ахттая махъ ссят 2-нний ва 8-нний. Амма апатI хьусса иширая гацIана баян байссар МахIачкъалалив. Диспетчертал даврийн бучIайхту гьарца кьини жухьхьун булай­ссар тестрал лагрулийсса 20 суал МахIачкъалалия. Гайннун жу анаварну 5 минутIрай жаваб дулун аьркинссар. Мукунна жущал дувайссар ученияртту. Масалдаран, чув-дунугу Ккуллал райондалий вертолет дагьну дур, цIу дагьну дур, лекьру хьуну дур, авария хьуну дур тIисса баян бавуртту дикIай. Му чIумал жун аьркинссар ми ишру хьусса кIанттайн аьркинсса кумаграл агьлу тIайла буккан.

Дагъусттаннайсса 41 райондалул дянив 2017-ку шинал Ккуллал райондалул службалул бувгьуссар 14-мур кIану. Мунийн бувну жун дуллунни Дагъусттаннал цасса службалул ХIурматрал грамота. На акъагу, шикку диспетчерталну зий бу­ссар: Кьурбидаев Аслан, Раджабов МухIуттин, Оьмариев Жамалуттин. Жул каялувчину ур ХIасанов Аьли-Юсуп.
— ЦIуллу аннав, МахIаммад, кIанийн бувтун бувсун тIий зула къуллугърая. АпатIру къашаваннав.