Ккуллал школалул тарихрава

Ккуллал школалул тарихрава

Аьрасатнал Виричу Халид Мурачуевлул цIанийсса Ккуллал 1-мур школа

ЯлунчIил, 2019-ку шинал, Ккуллал шяраву школа тIивтIуния шиннай бартлаглагиссар 90 шин. Мунийн бувну ттун бусан ччан бивкIунни кутIану ва школалул тарихрая.

1912-ку шинайнин Ккуллал жяматрал оьрчIру буккин-чичин лахьлай бивкIун бур шяравусса мизитирттачIасса школарттай. Цахъи бюхъу буминнал цала оьрчIру тIайла буккайсса бивкIун бур мадрасарттайн.
Яла, 1912-ку шинал, Щурагьиял округрал Кривенко тIи­сса губернаторнал ихтияр дуллуну дур Ккуллал шяраву 15 оьрчIансса дуниявийсса (светский) школа тIитIин. Вай оьрчIахь дарсру дихьлай ивкIун ур Дю­къуллал шяравасса Баг-Агъа тIисса учитель. Хъиривсса 1917-1918-ку шиннардий школа зий бивкIун бур Мавраев Шахру тIисса 1-мур ЦIувкIратусса учительнал каялувшиврий.

1924-ку шинал Ккуллал шяраву тIивтIуну бур байбихьулул школа. Ва школалул цалчинма учительну зий ивкIун ур Аьбдул Каранов тIисса Мащихъиял шяравасса учитель. Буккин-чичин лахьхьин буллай бивкIун бур ­аьраб мазрай.
1928-ку шинал Ккуллал ва Лак­рал районная гьан увну ур Буйнакскалийнай латин хIар­пирдай дарсру дихьлан лахьхьин бувансса 24 жагьил. Хъиривмур 1929-ку шинал ххюва класс­рал оьрчIаща дуклан бюхъайсса школалул къатри дузал дурну дур. Вана ва шинаяту шинмай байбихьлай бур Ккуллал школалул тарихгу.

ХIазат Даххаевлул цIанийсса Ккуллал 2-мур школа

Цалчинсса латIин хIар­пир­дайсса учебникру бувкIун бур школарттайн 1929-1930-ку шиннардий.1934-ку шинал школалия бувну бур арулла шинал школа. Хъаннива цалчинмур учительницану бивкIун бур Атаева Аминат, яла – Мирзаева Шюъбанат ва Абакарова ПатIимат.
1938-1939-ку шиннардий школалия бувну бур дянивмур даражалул школа. Амма, дяъви байбишайхту, чIявусса учительтал дяъвилийн бувцуну, гания цIунилгу бувну бур арулла шинал школа. Вания гихуннаймур кIулшиву ласун Ккуллал оьрчIру лаглай бивкIун бур ЧIяйннал шяравусса школалийн.
1952-ку шинал школалия цIунилгу бувну бур дянивмур даражалул школа. Школалий дарсру дихьлай ивкIун ур 41 учитель.

Дуклакисса оьрчIал сияхIгу диркIун дур 500-ннийн дирсса. Школалул къатри дурну диркIун духьурчагу, ялагу дузал къахъанан бивкIун бур оьрчIру битансса классру. Мунияту ца­ппара байбихьулул классирттал оьрчIру дуклай бивкIун бур таксса инсантурал къатраву ва жяматрал аьмсса къатраву.
1960-ку шинал дуклакисса оьрчIал сияхI лархъун дур 1000-ннийн. Мунийн бувну Ккуллал колхозрал харжлугърацIух дурну дур 8 классрал оьрчIансса къатри. 1974-ку шинал школалий дуклаки оьрчIал сияхI хьуну дур 1600. Му шинал мукунма колхозрал арцух бувну бур, шяраваллил цамур чулий, «сборно-щитовой» корпусращалсса, мяйра шинал школа.
Школалул директорталну зий бивкIссар:
Аккуев Сулайман (Ккул); ХIажиев Пагьабутта (Ккур­ккул); АьвдурахIманов Рамазан (Ккул); Жалилов ХIасан (Ккул); Лукьманов МахIаммад (Гъумучи); Загълиев ХIасан (Хъусращи); ХIажимурадов МахIаммад (Къян); ХIусайнаев Абачара (Хъусращи); СултанахIмадов Г. (ЧIяйми); Къянчиев Ибрагьим (Ккул); Жабраилов Д. (Ккул); МахIаммадов Ярагъи (ЦIуйши); Чупанов А. (Ккул); АхIмадханов А. (Ккул); Абакаров М. (Ккул); Оьмаров Аьли (Ккул); Исякьов М. (Ккул); Мамедбеков М. (Ккул); Къянчиев Руслан (Ккул).
Гьашину сентябрь зуруя шинай зий ур Чаринов Ма­хIам­мад.
1999-ку шинал Ккуллал 1-мур школалун дирзссар Мурачуев Халидлул цIа.

КIицI дуванну Хъун дяъвилий гьуртту хьусса Ккуллал школалий зий бивкIсса учительтурал цIардугу. Мукунсса хьуну ур 21:
МахIаммадов МахIаммад, Кьубанчиев Ибрагьим, Аьбдуллаев МахIаммад, Мамедбеков Аьжуб, Исяев Шихша, Жалилов ХIасан, Сулайманов Бадруттин, Масуев Аскандар, Аскандаров Загьиди, ХIакьикьурбанов ХIуса, Маммаев Рамазан, Мударисов Ризван, Аккуруев Рамазан, АьвдурахIманов Рамазан, Кьубиев Мирза, Кьурбанов МахIаммад, Сулайманов Шамсуттин, Оьмаров Аьли, АхIмадов АхIмад, Ибрагьимов Муса, Оьбаков ХIасан. Вайннава чIявуми дяъвилия зана къавхьуссар.
Дяъвилул шиннардий директорталну зий бивкIссар Загълиев ХIасан ва Лукьманов МахIаммад. Учительталну зий бивкIссар гай захIматсса шиннардий: Абакаров МахIаммад, Абакарова ПатIимат, Аскандаров Рамазан, Аьлиев Агъа, ТIилиев Рамазан, Шамхалов Аьбдул, Мирзаева Шюъбанат, Аьбдуллаева Муслимат, МахIаммадов Кьурбан, Аккуев Сулайман, Къянчиев Ибрагьим, Жабраилов Жабраил, Ословская Прасковья, Скрежевская Рита.

1951-ку шинал школалийн зун бувкIссар Гъумучиял педучилище къуртал бувсса учительталгу. Мукунма 1950-1954-ку шиннардий школалий зий бивкIссар Воронежскаллал, Там­бовскаллал, Курскаллал областирттая бувкIсса оьрус миллатрал учительтал: Афанасьева Антонина,Трегубова Шура, Белокань Дина, Дубова Тамара, Мурыгина Валя, Рындина Катя, Полякова Катя, Довженко Валя, Рубайло Вера, Вавилова Анна. Ккуллал школалий зий бивкIссар мукунма аьсатIин Хатангов Таймураз, немец Лурье. Цинявппагу зий бивкIсса учительтурал сияхI дур 94.
ХIакьинусса кьини школалий зий ур 30 учитель. Вайннал чIявуминнал цала даврий зий 40-нниха лирчусса шинну хьуну дур. ЧIявумигу лайкь хьуну бур лахъсса хIурматрал лишаннан. КIицI дуван ччива цаппарассаннал цIарду: МахIмудов МахIаммад, ХIусайнова Умму, Мамедбеков МахIаммад, Абакаров ХIусман, МахIмудов ХIамид, МахIмудов Адам, Къянчиев Руслан, Исякьов МахIаммад, Маммаев Рамазан, Сулайманов Жамал, МахIмудова Лида, Сулайманова Гулинжан, Юсупова ПатIимат ва цаймигу.

Рамазан Маммаев,  Ккуллал 1-мур школалул
завуч

Читайте также: