Декабрьданул 14-нний Дагъусттаннал паччахIлугърал медициналул университетраву хьунни Мариям Ибрагьимован 100 шин шаврин хас дурсса аьпалул вечер. Муний гьуртту хьунни лакрал,
Дагъусттаннал интеллигенциялул вакилтал, ДГМУ-лул студентътал. Мажлис бачин бувну ия Поэзиялул театрданул директорнал хъиривчу Ссупиян Оьмаров.
Бадрижамал Аьлиева
Аьпалул вечерданий гьурттушинна дурунни ДГМУ-лул ректор Сулайман Маммаевлул, ДР-лул Чичултрал союзрал председатель МахIаммад АхIмадовлул, АьФ-лул бусравсса энергетик, ДР-лул лайкь хьусса энергетик Аьвдулхаликь Халикьовлул, Лакрал райондалул администрациялул бакIчи Юсуп МахIаммадовлул, ДР-лул Жяматийсса палаталул член, МахIачкъала шагьрулул Калугалийсса вакил АьлиасхIаб Хархачаевлул, «ЦIубарз» журналданул редактор Хизри Илиясовлул, Кировский судрал судия ХIажимахIаммад ХIажимахIаммадовлул ва цайминнал.
Мажлисрал хьхьичIмахъ лавхъунни Сулайман Маммаевлул.
— ХIурмат бусса дустал, уртакьтал! ХIакьину жува бавтIун буру Дагъусттаннал паччахIлугърал медициналул институтрал выпускница, гьунар бусса чичу, шаэр, публицист, прозаик, художник Мариям Ибрагьимовая аьпалул махъру учин. Дагъусттаннал медициналул университет мудангу машгьурну бивкIссар цилла язисса аьдатирттайну, ххаллилсса тарихрайну. Вузрал тарихраву цила чулухасса бутIа бивхьуссар 1948 шиналсса выпускравух бивкIсса Мариям Ибрагьимовалгу. Жунма хъамабитан къааьркинссар, ца вуз бакъа, щалларагу республика машгьур дуллалисса жулва выпускниктал. Жул университетраву тIитIинтIиссар Мариян Ибрагьимовал творчествалун хас бувсса мурцIу, — кунни цалва ихтилатраву ректорнал.
Ккаккан дунни Мариям Ибрагьимовал оьрмулия ва творчествалия гьарта-гьарзану бусласисса документал фильм. Миву Дагъусттаннал ва Аьрасатнал машгьурсса инсантурал Мариямлуя ва мунил творчествалия увкумуних цал ялагу вичIидирхьукунгу бувчIлай бия, цуксса хъунмасса кIану бугьлай буссарив Мариямлул щалагу билаятрал литературалуву ва искусствалуву, цуксса лайкьсса кIанттай дуссарив билаятрал медиктурал кьюкьлуй Мариямлулмур цIагу.
Лахълахъисса мукъурттил лях-карах ДГМУ-рал студентътал ккалай бия Мариям Ибрагьимовал назмурду. Композитор Аьбдулла Фаталиевлул щаллу бунни Мариямлул мукъурттий цала чивчусса балай.
