ОьрчIру апатIирттая мюхчан бан

ОьрчIру апатIирттая мюхчан бан

Декабрь зурул 11-нний «Ххуллурдайсса культура» кампаниялул лагрулий Дагъусттаннал технический университетраву хьунни«Профилактика детского дорожно-транспортного травматизма» цIанилусса ккуркки стол.

Шикку гьуртту хьунни Аьра­сатнал ГУОБДД-лул хъунама, полициялул генерал-лейтенант Михаил Черников, Дагъусттаннал УГИБДД-лул хъунама Александр Шалагин, ДР-лул ХIукуматрал председательнал хъиривчу Рамазан ЖахIпаров, Дагъусттаннал технический университетрал ректор ТIагьир Исмяилов, «Движение без опасности» экспертцентрданул президент Наталья Агре, мукунма КIулшивуртту дулаврил ва элмулул, ЦIуллу-сагъшиву дуруччаврил, Транспортрал, Жагьилтурал, ЧС-рал министерстварттал вакилтал.

ХIакьинусса кьини ДТП-ву бала-апатIру хъанай бур чIявусса мюрщи оьрчIан. Цинярдагу Аьрасатнаву хъана­хъисса ДТП-ттал 12% мюрщи­сса оьрчIру хIаласса дур. Так ца 2017 шинал 8 азарунния лирчусса ДТП-тту дур машинар­ттаву оьрчIру бивкIсса. Мунияту, «Ххуллурдайсса культура» акциялул лагрулий нитти-буттан, перинатал центрдал медперсоналданун бувчIин буллантIиссар машинарттаву оьрчIру креслордай щябитаврил чара бакъашиву.
Республикалул УГИБДД-лул бусласимунийн бувну, нанисса шинал 10 зурул дянив республикалул ххуллурдай 1424 авария хьуну дур. Миннуву 311 инсан оьрмулуцIа хьуну ур, 2108 инсаннан личIи-личIисса цIунцIияртту хьуну дур. КIиттуршра ДТП-ву оьрмулуцIа хьуну бур 28 мюрщисса оьрчI, 225 оьрчIан личIи-личIисса цIунцIияртту хьуну дур.

ДакIнийн бутан, 2018 шинал январь зуруй Аьрасатнал ХIукуматрал цIакь дурссия ххуллурдай мюхчаншиву дузал дансса ва 2030 шинайннин инсантал оьрмурдацIа хьусса ДТП-тту хьун къаритансса стратегия. Ва иширайну дузал дан кабакьу баву мурадрай август зуруй щалагу Аьрасатнаву дайдирхьу­ссия «Ххуллурдайсса культура» цIанилусса информациялул ва кIулшивуртту дулаврил проект. Кампаниялул даву август зуруй дайдишин пикри хьуну бур гъинттул чIумалсса яла чIяруми ДТП-тту Аьрасатнаву ва зуруй хъанай тIий, тагьар къулай даву мурадрай. Августрая декабрь зуруйн бияннинсса чIумуй ва акция хьунтIиссар 15 региондалий.
Декабрь зурул 3-нния тIайла хьуну «Ххуллурдайсса культура» кампаниялул даву дайдирхьу­ссар Дагъусттаннайгу.

Читайте также: