Декабрь зурул лишанну

Декабрь зурул лишанну

Шинал гьарцагу чIумул, тIа­биаьтрал, жанавартрал ва лелуххантрал къуццу тIутIаврил дур цалла-цалла мяънарду, интернет тIий, цамур тIий, 

уттизаманнул цайми-цайми каширду да­къасса чIумал цайн бувну инсантурал шин цукунсса дикIантIиссарив, гьава цукунсса бикIантIиссарив кIул буллай бивкIсса.

Ция кIи дайдишайсса, цийну шин къуртал шайсса декабрьданулгу дур цинна хасъсса лишанну. Миннуйн вих шаву ягу къашаву – цамур иш.

* * *
Агарда декабрь барз баргъ бивтсса чаннасса хьурча, ялун нани­сса шин бакIлахъиялул чулуха лащинсса хьунтIиссар. Ялунмагурив, агарда декабрь барз бавщусса бикIарча, бакIлахъиягу авадансса хьунтIиссар.

* * *
Декабрь барз хъатрулул, гъарал-марххалттанул чулуха мискинсса хьурча, ялун нанисса инт ва гъигу мукунна кьаркьсса дикIантIиссар.

* * *
Декабрьданийсса къув-аьс – дяркъусса кIинтнил вакилли.

* * *
Декабрьданий левххун бувкIсса марххала-чIелмултрал (снегири) кIи дяркъусса дикIантIишиврия бусласиссар.

* * *
Декабрьданий бувсса марххал­ттанул бакIурду чIирттайн, чапардайн хъинну лавну бухьурча, гъи марч бусса, хъартусса дикIантIиссар, агарда чIирал, чапарданул ва мар­ххалттанул бакIул дяних манзил личIлай бухьурча, шин буллугъсса, авадансса хьунтIиссар.

* * *
Декабрьданул 28-мур кьини цукунсса дурив, мукунсса бикIантIиссар март барзгу.
Декабрьданул 29-мур кьини кунмасса бикIантIиссар апрель барзгу.
Декабрьданул 3-сса кьини цукунсса дурив, мукунссар май зуруйсса гьавагу бикIантIисса.
ХIадур бувссар
Бадрижамал Аьлиевал

Читайте также: