Дагъусттаннай дайдирхьунни «Ххуллурдайсса культура» цIанилусса щалагу Аьрасатнаву нанисса кампаниялул даву. Ванин хасъсса пресс-конференция хьунни декабрь зурул 10-нний «Дагестан» РИА-лий.

Шикку гьуртту хьунни «Движение без опасности» тIисса экспертцентрданул президент Наталья Агре ва УГИБДД-лул хъунама инспектор Руслан РахIимов. Кампаниялул хIакъираву ихтилат бунни Наталья Агрел. Ванил бувсунни ва проектрал лагрулий жулла республикалий декабрь зурул 3-нния байбивхьуну личIи-личIисса акциярду хьунтIишиву.
«Ххуллурдайсса культура» кампания зий 10-нния лирчусса шинну хьуну дур. Ва чIумул лажиндарай Госавтоинспекциялущал ва цайми идарарттащал цачIу вайннаща бювхъуну бур аьрххи-ххуллийн бувкми мюхчан бансса диялсса давуртту дан.

— АцIра шинал лажиндарай жу лахьхьин барду ххуллийн бувкминнан кувннал хIурмат кувннал буллан, оьрмулул нигьачIисса тагьар хIасул дуллай, бяст-ччаллий къабуклай, мяърипатрай занакьулу бикIан, ххуллийн бувксса чIумал, цинярда шартIру хIисавравун ларсун, личIлулну бикIан. Жул даврил хIасиллугу оьккисса къархьунни. Жу зун байбивхьусса шинал щалагу билаятрай ххуллурдай 36 азара инсан оьрмулуцIа хьуну ия, ларгсса шинал оьрмулуцIа хьуну ур 20 азара инсан. Ххуллурдайсса тагьарданул хIакъи-хIисавгу дурну, зун байбивхьу­сса чIумал жун бувчIунни, цирда аварияртту чан дан къабю­хъарчагума, миннуву инсантуран захIматсса цIунцIияртту къахьун­сса чаран лякъин хьунтIишиву.

Жулла давугу дайдишарду мюхчан байсса мухIулттив дахIаврил ялув бацIаврия. Та чIумал ми дархIуну 23% шупIиртурал занай бивкIхьурча, хIакьинусса кьини мюхчан байсса мухIулттив ишла дуллай бур 80% шупIиртурал. Мукуннасса дахханашиву хьуссар оьрчIал креслорду ишла бавривугу. Ряхра шинал хьхьичI оьрчIру мюхчан байсса креслорду ишлавагу буллай бакъассия. ХIакьину 60% оьрчIал креслордаву щябивтун бур.
Уттиния тихунмай жу ххишаласса къулагъас дуллан тIий буру скоростьрал ва хьунив ххуллийх буккаврил масъаларттах.
КIулну бикIан, агана шупIир ссятрай 60-70 километранияр ххишала ритлай най ухьурча, ДТП хьусса чIумал машиналувусса мюрщисса оьрчIру оьрмулуцIа къахьуншиврийн вихшала да­къар, — бувсунни Наталья Агрел цила ихтилатраву.

Ванил мукунма кIицI лавгунни хъуннасса къулагъасралун ласунтIишиву велосипедирттай заназиминнал, чIявусса оьрчIру бувцуну заназисса транспортрал масъалартту.
Ихтилат къуртал хьуну махъ, Наталья Агрел журналистурал суаллахьхьун жавабру дуллунни.
Щалагу билаятрай нани­сса «Ххуллурдайсса культура» программалул мурад бур аьрххи-ххуллийн бувкминнан, шупIиртуран бикIу, бахьттагьалтран бикIу, ххуллул низамрал тIалавшиннардацIун, мяърипатгу дуруччин лахьхьин баву.