Балчаннух ялугьлай яру къабуххай

Балчан. Ва ичIаллил хIай­вантраву инсаннал ца яла хьхьичIунмур дуснан хIисав бувай. Буслан бикIай, балчаннуя бурттигьу агьарча, тачIав балчаннул ганай ччан къадизайссар тIий.

[dropcap]И[/dropcap]нсаннаща хъинну хъунмасса хIаллай балчаннух ялугьлай ацIан шай. Балчан бур дакI марцIсса хIайван.
Уттигъанну на уссияв Ваччату Хъюйннал шяравун буккайсса хьунив ххуллийх най. Ттун бакIрайн дагьуна ЧIяйнна-Къурув дучрал илхъи. Ца балчан бия ххуллуву утту­бивхьуну. На нанисса ххал шайхту, га ххуллува бивзуна: укун­сса тIул инсанналгума бюхъай къадуван. Ялагу, инсан чIарах нанийни, балчан тачIав ганах къабурувгун, га сан къаувну къабикIай. Вил хъирив ялугьлайгума буссар.

Махъсса шиннардий Кку­ллал райондалийсса шяраваллал лагмасса лухччай янилун дагьлан диркIунни дучрал илхъив. ХьхьичIара ми архну зун­ттавуя дикIайсса. Ми ядуллай, ттун кIулссаксса, илхъичигума къаикIайва. Балчант цала цивппа ябуллалисса, дуканмунил хъирив цивппа бизлазисса хIайвант бур. Амма шяраваллаву яхъанахъисса инсантал, балчантрая рязи бакъа, цIуру-кIуру тIий бур. ЦIуххаву дуллалисса чIумал, щилли вай балчант тIий, гьич щищачIав ва суалдану­хьхьун жаваб дулунгу къахъана­хъир. Инсантурал рязи бакъашиврул хъунмур сававгу дучрал хъу-лухччив ккуччу дуллай бур тIисса. Бухьунссар вай ишругу.

[dropcap]Я[/dropcap]лагу жула зунттаву нажагь бакъа балчан дикIун къабиххай­ссия. Утти бихлай бур. ТIайлар та чIумал хаварду бикIайва, колбасартту дувайсса чIумал, гивун, консервант хIисаврай, балчаннул дикI дичайссар тIиссагу. Бюхъай. Амма ттул хIакьинусса ихтилат балчаннул дикIуя бакъарча, ва жунма Аллагьнал кумагран гьан бувсса ризкьи буруччин аьркинни тIисса бур. ХIасил, чIун хьуну дур Лаккуй вай балчантран, цанналу ккаккан дур­сса аьрщи, зунттурду личIи бувну, заповедник буван. Бусияра зуламур пикригу.

Лажин хIадур дурссар
ХIажимурад ХIусайновлул