Уттигъанну Москавлив Журналистътурал Централ къатраву хьунни Аьрасатнал Халкьуннал творчествалул къатлул баян бувну бивкIсса конкурсирттай ххув хьуминнан бахшишру дуллали­сса батIаву.

ХIасиллу дурну дия визуал творчествалул «От чистого истока» тIисса цIанилусса Щалагу Аьрасатнал IХ конкурсрал ва агьамшиву дусса миллатрал-культуралул проектирттал.

---

Бадрижамал Аьлиева
[dropcap]Ф[/dropcap]естивальданийн дуркIун дур циняврдагу 73 фильм. Миннун кьимат жюрилул 9 номинациялий бивщуну бур: «язимур документал фильм», «язимур телевизион репортаж», «язимур видеоочерк», «анимациялул язимур фильм», «язимур игровой фильм», «язимур видеоклип», «язимур звуко-режиссернал даву» ва «язимур операторнал даву».

Дагъусттан Респуб­ликалул Халкьуннал творчествалул къатлул ларсъсса «ЧIарадиял шяравусса Цалчинсса хъарас щаврил байран» тIисса даву «язисса документал фильм» тIисса номинациялий лайкь хьунни 1-мур даражалул дипломран. Мукунма Рес­публикалул Халкьуннал творчествалул къатта, Халкьуннал творчествалул къатрал информациялул даврил ХII смотрданий гьуртту хьуну, лайкь хьунни 4 дипломрангу, миннувух «Весенние обрядовые праздники в Дагестане» буклет­рахлугу. Шиккува кIицI лаган, ва буклетраву дуссар лакрал ца­ппара шяраваллал (Шахьуйннал, КIундиннал) гьашинусса хъарасирттаясса суратругу.

Мукунна хьунни печатьрал продукциялул ккаккиягу, микку гьарцаннаща бюхълай бия Аьрасатнал цайми регионнайсса цалва уртакьтал ссаха зий буссарив ккаккан.
Шанма гьантлий лахъи ларг­сса фестивальданул лагрулий хьунни личIи-личIисса семинарду, мастер-классру.