Декабрьданул 25-нний ДР-лул БакIчи Владимир Васильев хьунаавкьунни «Кванториум» тIисса оьрчIал технопаркрал аькьлу-кIулшилул чулуха итххявхсса,
Аьрасатнал ва дунияллул халкьуннал дянивсса олимпиадарттай ва конкурсирдай ххув хьусса ва хьхьичIунсса кIанттурду бувгьусса оьрчIащал.
Миннащал яхши-хаш бувну махъ Дагъусттаннал БакIчинал увкунни: «Зу, зул давурттив, зул хьхьичIуннайшивуртту – ми, оьрчIан дакъасса, жун, бугьараминнангу, эбратранссар. Му ххуллийх нанисса агьлу гьарца чулуха тIайласса, аьдлулийсса, хьхьичIунмай итххявхссар бикIайсса, мунияту мукунсса агьлулул дянив яхьун хъинну ччангу бикIайссар. Барчаллагь зун уттинин дурмунихлу, хъунмасса барчаллагь зул нитти-буттангу, зу хъамамабитару миннал бувмур».
Яла оьрчIал буллай бия суаллу, Владимир Васильевлул миннухьхьун дуллунни жавабру. ОьрчIахь мунал бувсунни республикалул промышленностьрал давурттаву хъанахъисса лябуккулия, Дагъусттаннал заводру цукун зий буссарив, цукунсса технологияртту ишла дуллай буссарив.
Региондалул каялувчинащал архIал бивзунни цаппара министртал, технопаркрал директор Марат Аьлиев ва цаймигу.
