Дагъусттаннал БакIчиначIасса оператив батIаврий

Дагъусттаннал БакIчиначIасса оператив батIаврий

Декабрьданул 24-нний ДР-лул БакIчи Владимир Васильевлул дунни республикалул паччахIлугърал властьрал органнал каялувчитуращалсса батIаву.

Муний дунни цаппара министерстварттал ва ведомстварттал давурттал хIасиллу ва бувсунни ялун нанимур шинал дузал бансса ма­съаларттая. БатIаврий дурсса давурттал хIасиллая бувсунни ДР-лул ЦIуллушиву дуруччаврил, ЗахIматрал ва социал иширттал, Миллатирттал, Культуралул, Минкомсвязьрал, МЧС ГУ-рал министерстварттал каялувчитурал. Миннул давурттан кьимат бивщунни ДР-лул БакIчинал.

ЦIуллушиву
дуруччаву
Республикалул цIуллушиву дуруччаврил министр Жамалуттин ХIажиибрагьимовлул тIимунийну, цIуллушиву дуруччаврил масъаларттава ца яла агьаммурну хъанай бур медициналул идарарттансса зузалт хIадур баву. Дагъусттаннай шяраваллаву духтуртал биялну бакъар. Гьашину шяраваллил кIанттурдай давурттай ивтун ур сайки 220 инсан. Миннавату «Земский доктор» тIисса проектрал лагрулий шяраваллавун гьан увну ивкIссар 176 инсан. Министрнал бувсунни мукунма хIакинтурал харжру лахъ баврия, медициналул идарартту бакьин баврия, цIусса азарханарду тIитIаврия, лавайсса даражалул технологиялул гьанулийсса медициналул кумаг буллалаврия, цIусса медициналул кьай-кьуйлул щаллу баврия, къашайшалт дарурттал щаллу баврия, инсантал литIаву чан шаврия.

Социал политика
Гьашинумур шинал давурттал хIасиллал ва ялунчIин дан аьркин­сса давурттая ихтилат бунни ДР-лул захIматрал ва социал иширттал министр Изумруд МухIуттиновал. Мунил тIимунийну, гьашину давур­ттал дузал баву хIисавравун ларсун Дагъусттаннал агьали давурттал щаллу баврил идарарттал шамилчинмур кIану бувгьуссар АьФ-лул субъектирттал дянив. Мунил мукунма бувсунни циксса инвалидтал давурттал щаллу бувссарив, цикссаннан кумаг бувссарив ЖКХ-лул хIаллихшиннахсса буржру ла­хъан, циксса норматив актру кьамул дурссарив, оьрчIансса напакьар­тту булавриву хьусса дахханашивур­ттая, циксса дяъвилул ветерантуран дуллуссарив къатри ласунсса субсидияртту.

Миллатирттал
политика ва диннал ишру
Миллатирттал политикалул ва диннал иширттал министерствалул давурттая бувсунни му ведомствалул каялувчи Татьяна Гамалейл. Мунил тIимунийну, министерствалул зузалт зий бивкIссар муниципалитетирттащал. «Межнациональные процессы в Дагестане: проблемы и перспективы» тIисса программалул лагрулий сакин бувссар муниципалитетир­ттал зузалтрал кIулшивурттал даража лавай бансса курсру. Районнал агьалинащалсса семинар-совещанияртту буллай бивкIссар кIантту-кIанттурдай. Дагъусттаннал 17 райондалий бартдиргьуссар «Ци иш бур, чIаххувчу» тIисса проект. Мукунма зий бивкIссар жагьилтуращалгу. Мура жагьилтуращалсса даву лахъи лаган дантIиссар ялун нанимур шиналгу. Татьяна Гамалейл бувсунни мукунма дурсса цаймигу давурттая.

Культура
Культуралул бутIуву дурсса давурттая бувсунни ДР-лул культуралул министр Зарема Буттаевал. Мунил тIимунийну, гьашину хъуннасса къулагъас дурссар республикалул культуралул масъаларттах. Мунил бувсунни республикалул творчествалул коллективирттал давурттая, оьрчIал конкурсирттай ларсъсса ххувшавурттая, театрдал хьхьичIунсса ккаккиярттая, Европанал чемпионатрайсса культуралул программалия, дунияллул халкьуннал дянивсса фестиваллая.

Читайте также: