[dropcap]О[/dropcap]ктябрьданул 31-нний ДР-лул БакIчи Владимир Васильевлул жавабру дуллунни федерал ва республикалул журналистътурал суаллахьхьун.

Суаллу буллай бия 2019 шинайнсса ва пландалийн ларсъсса 2020 ва 2021 шиннардийнсса ДР-лул бюджетрал проектрал хIакъираву.

---

Суаллу буллан хьхьичI республикалул каялувчинал бувсунни махъсса ппурттуву дурсса давурттая ва миннул хIасиллая.
«Ттун бувчIуссаксса бюджет – му бур гьарзатрал гьану: хьхьичIуннайшиврул, лябуккулул, социал масъалартту бартбигьаврил. Уттигъаннунийн жулла республикалий бия марцIну социал бюджет. ТтучIанма инсантал бувкIсса чIумал, на учайссия, жучIа арцу дакъар, куну. Цинярда арцу циксса чун наниссарив кка­ккан дурну дикIайва статьярттайну социал мурадирттай. Жул мурад бия ми арцу ядуван ва муштариначIан диян дуван, мюнпатну ишла къадуллалими ссуссукьу дуллай. Утти тамансса дахханашивур­тту хьунни.

[pullquote]Шамлий гьарза дурссар рес­публикалул инвестициярттал программалунсса харжлугъ, утти бюхъантIиссар дузрайн дуккан дуван цинярда социал проектру, щаллу буван утти­нийн бакIуйн буккан буван къавхьуну бивкIсса газрал ва щинал щаллу баврил масъалартту.[/pullquote]

Ттул даврил уртакьнал бусан­ссар, чату дуркIссарив ми арцу» увкунни В. Васильевлул.
Дагъусттаннал БакIчинал бувсунни республикалийн ФОМС-рал Председатель Наталья Стадченко бучIаврил хIакъираву ва СМИ-рдал вакилтурайн тапшур бунни властьрал законну бартдигьаврил органнал давурттал ялув бацIан, миннувух ФОМС-ралссаннулгу. Мунал бувсунни Дагъусттаннал ФОМС-рал дурсса закон лиявурттая. Республикалул каялувчинал тIимунийн бувну, Дагъус­ттаннал ФОМС-рал хъунаману итлати­ссар Къиримнаву мува къуллугърай зий ивкIсса ва тийх ФОМС-раву низам дирхьусса инсан.
Дагъусттаннал БакIчинал бусаврийну мукуннасса даву дуллай бур ххуллурду баврил бутIувугу.

[dropcap]В[/dropcap]ладимир Васильевлул бувсунни муххал ххуллул, авиациялул масъалар­тту цукун бартбигьлай буссарив. Мунал гьаз бунни мукунма республикалул ихтиярду дуруччаврил органнал давур­ттал хIакъиравусса масъала, хаснува терроризмалул идеологиялийн къарши бу­ккаврил масъала.

ДР-лул ХIукуматрал Председатель­нал хъиривчу ХIажимахIаммад ХIусай­новлухьхьун махъ булун хьхьичI, Владимир Васильевлул бувсунни хъунмасса кьимат бишлай ушиву му пишакарнал давурттан. Яла видеоконференциялий ХIажимахIаммад ХIусайновлул бувсунни 2019 шинайнсса ДР-лул бюджетрал проектрал хIакъираву.

ХIадур бувссар ХI. Аьдиловлул