Школалул сий-симан ххуй хъанай дия

Школалул къатри

Ккуллал шяравусса Аьрасатнал Виричунал Мурачуев Халидлул цIанийсса 1-мур школа бакьин буллан бивкIунни.Ва школалул къатри цакуну дурну дакъарча, лахъисса шиннардий дуллай бивкIун бур.

Махъра-махъми школалул къатри дурну дур 1960-ку шинал. Ганияр махъ шикку гьанусса къатри дакьин даву къархьуну дур. Дуллай бивкIун бур ялттурасса дакьин давуртту.


Вана утти «100 школа» тIисса Республикалул проектрай лавсун бур ва школа. Ва проетрайн бувну хIукуматрал итадакьлай дусса дур 2 миллион къурушрал. Гайми школартту бакьин бувансса арцу Республикалул БакIчинал Владимир Васильевлул тавакъюрайн бувну, каши дусса инсантурах кабакьу бувара тIий бур.

Уттигъанну на лавгра Ккуллал цалчинмур школалийн ци давуртту дурну дурив ябитан. Хьунаавкьура школалул директор Чаринов МахIаммадлущал. Ванал бувсуна школалул къатри дакьин дуван кумаг бувшиву школалий дуклай бивкIминнал ва Ккуллал чиваркIуннал. Миннал дуллусса арцух даххана дурну дур отопления. Дукра дай­сса, дукайсса къатта бизан бувну бур цамур кIанайн. Вай давур­тту дурну дур Вихьуллал шяравасса МахIаммадов Басирдул бригадалул. Директорнал кIицI дуруна ка кIидархIусса инсантурал цIарду: Аккуев Карин, Мурачуев Рамазан,Кьубатаев МахIаммад,Кьурбанов Чупалов, Аьлиев ХIасан,МахIаммадов Рамуз, ХIусманов Кьурбан, Рамазанов Ширвани, Исакьов ХIасан, Жабраилов Алексей, МахIаммадов АьвдурахIман, Кьадиров Халид.

ЦIусса батареяртту

ХIукуматрал итадакьлакьими арцунсса давурттив дуванма язи угьантIий усса ия, тендер баян бувну, ххув хьума. Му уттигу кIулну акъая.
Муния махъ школалул завхоз Аьбдуллаев Аьлил ттун ккаккан дуруна дурсса давурттив. Кла­ссирттаву, жанахIирттаву уттизаманнул батареяртту бивхьуну бия.Баххана бувну бия бургъурду, бакьин бувну бия котельный. Дирхьуну дия цIусса насосру. Котельнайлуву зий бия МахIаммадов Гьарун ва Гудов МахIаммад. Аьлил ттухь бувсуна шинал мутталий харж шайшиву 70-нийн дирсса хъуручIул тонна. ХъуручI цила чIумал бучIай тIий рязину ия.
ТIайлар столовойлувуми давуртту найнна дия. Амма яла аьркинсса щин дурцуну дия. Шикку зий бия цала даву ххуйну кIулсса Мамедбекова Къиза ва Мирзаева Муслимат. Ттунгу дуллуна вайннал цала дурсса дукия ххал дан. Хъинну нахIусса дия.

Аьшвашханалуву

Учительскайлуву ттун бакI­райн агьуна ттула ччянива­сса дус-ихтивар, Ккуллал 1-мур школалул директорнал хъиривчу Маммаев Рамазан Малланал арс. Ванал дуллуна цала хIадур дурсса школалул тарихрая бусласисса оьрус мазрай чирчусса макьала, «Илчи» кказитрай рищун. Нагу му, таржумагу дурну, кказитрайн гьан дував. Шиккува Рамазаннул кIицI бувуна га кьини школалий педсовет бушиву. На ванахь тавакъю був­ссия педсоветрай учительтурахь чара бакъа «Илчи» кказит чичин аьркиншивугу буси куну. Чичиншиврийнгу ттул хъунма­сса умуд бур. ЯлунчIил, 2019-ку шинал, Ккуллал 1-мур школалун там хъанай дур 90 шин. Умуд бур муниннин школалул сий хъиннура ххуй хьунссар тIисса.