Ккуллал шяравунсса аьрххи

Ккуллал цалчинму ккурчIа

Уттигъанну, ттула даврицIун бавхIусса иширайн бувну на лавгссияв Ккуллал шяравун. Ккуллал шяравалу хъанахъиссар циняв дунияллийсса лакрал шяраваллавусса ца яла чIявусса инсантал яхъанахъисса шяравалуну.

Ванил ца зумания гамунийн дуссар тIар мукьра километра.Бувар Ккуллал шярава инсантал, вайми шяраваллах бурувгун, хъинну чан хъанангу. Му иш на хIисавравун ласлай ура, Ккуллал дяшяравухсса ххуллийх найни, ккурчIав щябивкIсса инсанталгу итталу бувгьуну. Ккуллал инсантал цивппагу хъинну дакI-аьмал хъинсса, ссавур дусса инсантал бур. КкурчIав ттун бакIрайн агьуна Ккуллал шяраваллил администрациялул бакIчи Рамазан Аьлиев. На Рамазаннухь бувсъссия ттула аьрххи Ккуллал цалчинмур школалийнсса бушиву. Мугу яла ттущал увкIуна.


Ккуллал шяравух най бур Дагъусттаннал республикалул лагрулийсса ххуллу. Картардайгу мукун ккаккан бувну бур. Амма ва ххуллух цимигу шинай вари чинсса буругаву дурну дакъар. Яний бакьин буван аьркинну бур.

-Ва ххуллу Ккуллал администрациялул балансрай ба­къар. Мунияту ттуща ваниха зунгу бюхълай бакъар, — тIий ур Рамазан.
Бунияла, ва бакьин барчагу, шиккува гьаз буван багьлай бур цамургу ца иш. Нажагь (учин бакъассар), Аьрасатнал аьралий гужирдал ученияртту дуллай ва цала картардайсса ххуллу кунмасса бухьунссар тIий, шичча танкарду, цайми аьралий техника дачирча, ми шичча къагьантIий дур.

Ккуллал кIилчинмур ккурчIа

[dropcap]М[/dropcap]унийн бувну ва ххуллу шяраваллил къирагъирайх буван багьлай бухьунссар.
Щилли ва масъала хIукму­читурал хьхьичI гьаз буван аьркинсса? ХIасил, ва анаварну биттур буллан аьркинсса ма­съала бур. Ххуллийх най бунува, жун хьунабавкьуна къатта-къушлива дурксса ххиличIлурду датIлатIисса машинагу.
— Гьарца арвахIкьини на гьан бувайссар шяравусса къатта-къушлил ччюрк, ххиличIлурду датIинсса машина. Ялагу тталаткьини шяраву дикIайссар дахху-ласу дуллалисса ярмукIа. Му кьинигу хIасул шай чIярусса ххиличIлурду. Вай дукьаннугу инсантурая ласайсса «самообложениялул» арцуяту дулара, — буслай ур Рамазан.

ЦIуллу увссара ина Рамазан. Гьай-гьай, Ккуллал кIива хъунисса ккурчIавсса арамтурал суратругу рирщуссия. Махъунай школалия зана хьуну нанийни, увхссияв Ккуллал почталийн, «Илчи» кказитрал подписка цукун най дурив кIул дуван. Жунма цакьнива кIулсса Ккуллал шяраваллил почталул каялувчинал Аьлиева Пизатлул, подпискалул ялув цищава шайсса хIарачатгу бувай. Ванихь бувсъссия на мукунма шяраваллил бакIчинал Аьлиев Рамазаннулгу кабакьиншиву.
Ванину ттул га кьинисса Ккуллал шяравунсса аьрххи байливтIуна, дакIниву тIааьнсса асардугу ххишала хьуна.

Лажин хIадур дурссар
ХIажимурад ХIусайновлул