Премьер-министрнал тIиму­нийн бувну, му масъала респуб­ликалул циняв халкьуннан му­радлувсса бур. «Зун цинявннан кIулли цIанасса каналлавух иш­ла дурсса чапалсса щин дачин захIмат хъанай тIий, ми щин марцI дай­сса сооружениярттачIан диллай дакъар,

мунияту Каспий хьхьирийн экьинай дур марцI къадур­сса чIярусса щин (стоки), мунийну хъанай дур экологиялул чулийсса захIматшивуртту», — увкунни Артем Здуновлул.

---

 

Мунал мукунма бувсунни цукунсса давуртту дуллай буссарив му тагьар да­ххана даншиврул. Коллектор дуллалисса чIумал тамансса диялдакъашивуртту хьун дурну дур, утти га проект даххана дан багьну бур. Мунал бавтIминнахь бувсунни яла гъансса чIумул мутталий Аьрасатнал Минстройрайн тIайла буккан аьркиншиву коллектор гьарта ва цIудуккан даву исват буллалисса документру, 2019 шинал ми давуртту дуллай байбишиншиврул.

Яла ДР-лул строительствалул ва ЖКХ-лул министр Малик Баг­лиевлул бувсунни проект бартдигьиншиврул дуллалисса давурттал хIакъираву.
Мунал тIимунийну, му масъала чулийн буккан баврия хъунмасса мюнпат хьунтIий бур щалла республикалун. Щин марцI дайсса сооруженияртту зузи­сса чIумал марцI хъанантIиссар МахIачкъалалия ва Каспийс­калия хьхьиривун нанисса чапалсса щин. Мунийну ххуй-хъин хьунтIиссар хьхьирил чIарахсса кIанттурдайсса экологиялул ва санитар-эпидемиологиялул тагьар.
БатIаврий гьуртту хьунни ДР-лул хIукуматрал Председательнал хъиривчу ДР-лул аьрщарал ва хъуслил арардал министр Екатерина Толстикова, МахIачкъалаллал бакIчинал буржру чIумуйну бартбигьлагьисса Абусупиян ХIасанов ва цаймигу.
ХIадур бувссар
ХI. Аьдиловлул