Та нюжмардий, арвахIкьини, «Илчилул» редакциялий бавтIун буссия жула лакрал агьалинал дянив махъ нанисса цаппара вакилтал. Миннавух буссия: Сиражуттин Илиясов,

Ссапарбаг Аьбдуллаев, Гульшан Хасаева, Рапи Абакаров, Муса Мащилиев, АьбдурахIман Адамов, Аслан Аьлиев. БатIаврил хъунмур мураднугу бия жула ниттил мазрацIун дархIусса дунияллий хIакьину хьунадакьлакьисса захIматшивурттугу, гьарца чулухасса ссуссукьушивурттугу хIисавравун ларсун, жунма цинявннан ххал бигьин, бартбигьин аьркинсса масъаларттай цал уттигу чIурчIав даву, миннух аякьалийсса я буруган баву.

---

[dropcap]М[/dropcap]у хьунабакьаврил хьхьичIунми инициаторталну бия МахIаммадал арс Сиражуттин Илиясов ва Аьлил арс Ссапарбаг Аьбдуллаев. Ца зумату кунма, цинявн­нал буллалисса ихтилатругу бия уттисса чIумал жула миллатгу, миллат миллатну бушиврул ца яла хIакьмур барашиннану хъанахъисса ниттил мазгу бурувччуну личIлай ба­къашивриясса.
Лакрал театрдануву сакин хъана­хъисса захIматшивурттая, аьщу-ххуттай авцIуну, бувсуна С. Илиясовлул.

Цищава шаймургу, ца ххишалагу коллективрал буллайгу бунува, республикалул вайми театрдал дянив ца ххутталвагу ялавайну бакъа бунува, гьарца шаттирахун тIиссакссагу хIасул хъанай бур цайнува цащава бартбигьин къахъанахъисса масъалартту. Так ца бюджетрал ххуллий итадакьлакьисса арцуйну бюхълай ба­къар театр­данул аьркиншин щаллу дан: дух дур­ккун дур янналул гардероб, тIартIун дур транспорт, гастроллайн лавгукунгу, инсан уххан шайсса куццуй бакъар щархъал клубру, кув щархъаву, левкьун, бувагу бакъар…

Театрдануха къалархьхьусса духьурчагу, дур мура кьяйдалий­сса ссу­ссукьушивуртту ва мюхтажшин ла­кку мазрай буккайсса кказит-жур­наллал редакцияр­ттайгу, радио-те­левидениялийгу, ниттил мазрал дарсру дихьлай-къадихьлахьисса учкъуларттайгу.

Ча, жунма цинявннан, чансса бухьурчагу чантI увкуну ялапар хъана­хъиссару тIисса лакран, Лакку кIан­ттулгу, лакку мазралгу хIакьинусса тагьар чIалачIиминнан, чIалачIимуний дакI-ттиликI цIуцIиминнан, аьркинну бур иширайнусса гьурттушиву дуллан, ла­кку культуралуцIун, лакку мазрацIун бавхIусса гьарцагу идаралул чIарав бацIан, асар хьунсса кабакьу буллан, вичIахух чIирттугу бувну ялапар хъанахъими намусравун бичинсса чаранну ляхълан. Мунищала архIал, чIарав бацIлацIиминнал цIардугу зумату щяв къадишин.

Р. Башаев