Октябрьданул 22-нний ДР-лул ХIукуматрал Председатель ­Артем Здунов хьунаавкьунни Костромаллал улклул губернатор Сергей Ситниковлущал. Му Дагъусттаннайн увкIун ия къуллугърал иширттай.

Хъамаличунахь аьла-ссалам буллай, премьер-министрнал кIицI бунни Сергей Ситниковлул аьрххи-ххуллул мурадрая. Губернатор ивну ур Дагъусттаннай цалва хьхьичI бивхьу­сса масъалартту бартбигьлагьисса Костромаллал улклул МВД-лул управлениялул ва Росгвардиялул ОМОН-далул кьюкьри лирк­сса кIанттурдайн.

-Жулла субъектирдал дянив дузал дурну дур уртакьну зузаврил план ва муницIунсса цаймигу ххуллурду – медициналул курортрал зонарду, чавахъ ва чавахъирттал сурсатру. Миннуяр ххишалагу, жунна аьркинну бур къюмай тIутIи машай бу­ккан баву гьарта-гьарза дуван, мукунна Дагъусттаннал хъузалт­рал ласайсса бакIлахъия зучIан гьарзану диян дуллан, — увкунни Артем Здуновлул.
Сергей Ситниковлул бувсунни делегациялул мурад, экономикалул масъалартту бартбигьаврияр ххишала, культуралул программагу ккаккан даву бушиву. Жу Дагъусттаннайн буцарду цIа дурксса творчествалул коллективру, миннувасса цаппара дунияллийх машгьур хьуссар, — увкунни губернаторнал.

Мунал бувсунни мукунма Да­гъусттаннай гъинттул бигьалаг­лансса пикригу бушиву.
ДакIнийн бутанну, дукIу декабрьданий Сергей Ситников увкIун ивкIссар Дагъусттаннайн, та чIумал МахIачкъалалив Сергей Ситниковлул ва Владимир Васильевлул хьунабакьаврий ххал бивгьуну бивкIссар машлул ва экономикалул, элмулул ва техникалул, мукунма культуралул хIакъираву Да­гъусттаннал ва Костромаллал улклул дянив уртакьну зузаврил масъалартту.
КIивагу чулухаллил дахIа­вуртту гьарта ва цIакь шаву мурадрай, гьашину апрельданул 3-нний кIирагу региондалул каялувчитурал къулбасру дур­ссар ДР-лул ва Костромаллал улклул дянив 2018 шиннардий кьутIи дузрайн дуккан даврил хIакъиравусса давурттал пландалий.

ХIадур бувссар
ХI. Аьдиловлул