Сентябрь зурул 29-нний Каспийскаллал 1-мур школалий ялавайми классирттал дуклаки оьрчIру, лякьри цIий,
шагьрулул азарханалул инфекциялул отделениялийн биян бувну бур, 21 оьрчI уттуишин увну ур, 6 оьрчI поликлиникалийн занай усса ур. Лабораториялул анализирттайну чIалан бивкIун бур оьрчIру инжит шаврил савав сальмонеллез инфекция душиву.
П. Рамазанова
Роспотребнадзорданул управлениялул зузалт, школалий дукра данмур ча машан ласайсса, ча дучIан дувайсса дуссарив, продукты цукунсса дуссарив ххал дуллай, хъирив бизлай бур. Мукунма ххал буллай бур школалул лагма-ялттусса дуки-хIачIия дахлахисса павильоннугу. ОьрчIру инжит шаврил савав кIул дуваннин пищеблокрал давугу дацIан дурну дур, ихтиярду дуруччай органнайн материал тIайла дурккун дур.
Дагъусттаннал Роспотребнадзорданул школарттай ва оьрчIал коллективрттаву дуллалисса дукралул ялув бацIаву тачIавгу хIура къадувайсса дур. Дукралул тагьар ххал дуллай хъирив багьсса чIумал, исват хъанай бур чIявумур чIумал багьана бушиву я бух хьусса холодильникру, ягу дукра дувайни кувнницIун кув къадакьайсса дукрарду менюлуву душиву, ягу ядуван аьркинсса куццуй продукты къаядуллай бушиву.
Му бакъассагу, машан ласлай бур даххултраща кьюркьуми дуки-хIачIия. Гъилисса дукра дансса сант дакъасса шяраваллал школарттайрив оьрчIайх сокру, нацIушинна, ахъулсса ва муму-тамур дачIлай бур. Миннуятугур нигь дусса. ОьрчIру дуки-хIачIиялул дузал бавриву санитар кьараллу къадурурччуминнай сайки шанма миллиондалучIан диявайсса аькIри дирхьуну дур.
