Ларгсса итникьини РИА «Дагестан» идаралийн, V-мур Дунияллул халкьуннал дянивсса динийсса жагьилтурал форумрал хIасиллу дуван, журналистуращал хьунабакьин бувкIун бия динийсса идарарттащал зузисса комитетрал хъунаманал кIанттайсса МахIаммад АьвдурахIманов, муфтинал кумагчи МахIаммад МахIаммадов, МахIачкъалаллал епархиялул вакил Иеромонах Иоанн, ягьудинал Ккураннал советрал вакил Борис Ханукаев.

МахIаммад АьвдурахIманов­лул бувсунни форумрал лагрулий чIярусса мероприятияртту дуршиву, миннувух махъ нанисса динчитуращал­сса, паччахIлугърал ва жяматий­сса ишккаккултращалсса хьунабакьавуртту, республикалул цIанихсса кIанттурдайнсса экскурсияртту, элмийсса конференцияртту. Бувсунни чялишну гьуртту хьушиву жагьилтурал ккураннал бакIчитал ва активистал, республикалий рувхIанийсса тарбия дулаврил ялув бавцIуми, патриот асардал дакIру гьузиххин дуллалими, терроризмалул ва экстремизмалул идеологиялущал талатими.
Ялун нанисса ник тарбия дуллалисса кадрардал квалификация гьаз дувайсса лабораториялун ккаллиссар форум, ванил лахьхьин буллалиссар жагьилтурал бакIчитурангу цукун къу­ццу тIун аьркинссарив, — увкунни АьвдурахIмановлул.
Иероманах Иоаннул (Анисимовлул) цалвамур ихтилатраву чIуручIав дунни жулла мяърипатрал гьану ца бушиву, шаннагу диндалул аьмсса ххазинар­тту бушиву. Борис Ханукаевлул кIицI лавгунни республикалул динийсса идарарттащал зузисса комитет хъуннасса даву дуллай бушиву, шаннагу диндалул жагьилтал кувннащал кув бавкьуну, нахIуну къуццу тIутIи буваву мурадрай.
Форумрай бакъагу, личIи-личIисса семинардай, конференциярттай, динийсса байраннай ва цаймигу мероприятиярттай агьалинал дакIурдиву жува циняв, динну, миллатру личIи бакъа, Дагъусттаннал ца кулпат кунма, бавкьуну занакьулу хъанай бушиву асар хъанан бикIай. Жагьилтурал ва нахIушиврул дарс ялун нанисса никирангу лахьхьин дуллан аьркинссар, му кIану хIисавравун лавсун, форумгу дакьаврил, цачIушиврул дарсри, — увкунни Борис Ханукаевлул.