[dropcap]С[/dropcap]ентябрь зурул 26-нний Ваччиял шяраву хьунни «Ирс» цIанилусса фольклорданул фестиваль. Вара кьини хьунни «Пагьламан» тIисса фестивальгу.
Фестивальданий гьуртту хъанай дия Ккуллал, Лакрал, Ахъушиял, Агъуллал, УнцIукIуллал, Ахвахуллал, Лаващиял, Гергебиллал районну.
[dropcap]В[/dropcap]аччавсса майданнив циняв шяраваллал личIи-личIину хIасул бувну бия дуки-хIачIиялущалсса, буттахъал цIурихьулуву, ужагърай ишла дуллай диркIсса матахIирттащалсса къатта-къушру. Шикку бия кIарттул ччатI, ини, дукьрахIан, аьрайн-гьавккури, личIи-личIисса ххункIру, буркив, шархь дикIру, хьхьахьхьари, ва чIярусса цаймигу дукрарду. Дия шиккура ссупралул чIарах дирхьуну чIярусса матахI. Циняв шяраваллал гьурттучитал бия шяраваллан хасъсса янна-уссуву.
Ирсирай жуйнна дирмур ядаву, ххишала бакъа хъинну аьркинсса ишну хъанахъиссар.
[dropcap]Ф[/dropcap]естивальданул сиптачиталну хъанай бия Ккуллал район, Дагъусттаннал культуралул министерствалучIасса Халкьуннал творчествалул къатта. Фестивальданул дайдихьу дуруна «Вирттаврал аллеялучIату» майданналул чулинмай кьюкьлуй бачаврийну. Кьюкьлул хьхьичI най бия: Ккуллал райондалул бакIчи Шамил Рамазанов, фестивальданий гьуртту хьун увкIсса Ахъушиял райондалул бакIчи АхIмад МахIрамов, Лакрал райондалул бакIчинал хъиривчу Абакар Къюннуев, Лакрал ва Ккуллал районнал цач1усса прокуратуралул зузалт ва цаймигу хIурмат лавайсса хъамал. Кьюкьлул хъиннура сий дутлай дия ЧIяйннал шяравату, балчаннуйгу буртти бивтун, наврузбагхъаннийн бувцуну нанисса жалиндалул. Тямадану ия дукьрахIанттил кIартташилущал, кIичIулущал нанисса шяраваллил хъуначу Оьмаров МахIаммад. Кьюкьа майданнив, райондалул заллухъру ва хъамал ялтту бувккуна шяраваллал «къатта-къуширттал». Бисмиллагь бувуна ссупрардайсса дукрардая.
[dropcap]Ш[/dropcap]иккура хIасул дурну дия шяраваллил хозяйстварттал хьун дурсса ахънилсса, ахъулсса, дахлахисса ярмукIагу. Дия дахлай мукунна янна-кагу. Яла дайдирхьуна агьаммур фестиваль.
СахIналул давуртту дачин дурну ия Хъусращиял шяраваллил Халкьуннал театрданул режиссер Сулайманов Марсел.
Фестиваль барча дуллалисса махъру лавхъуна: Шамил Рамазановлул, АхIмад МахIрамовлул, Абакар Къюннуевлул, МахIаммад Камиловлул.
Цалчин цала гьунарду ккаккан бувуна, маразрайх лахъай, пагьламантурал. Гьунарду ккаккан бувуна Ккуллал райондалул, МахIачкъалаллал циркрал студиялул ва Огниллал школалул пагьламантурал. ЧIявуми пагьламантал чIавасса оьрчI-душру бия. Амма вайннал маразрай ккаккан буллалисса гьунардал инсантал махIаттал буллай бия. Машаллагь!
Хъирив хъинну ххуйсса фольклорданул къавтIавуртту ккаккан дуруна, балайрду увкуна Ккуллал, Лакрал, УнцIукIуллал, Аьхьхьахъиял, Лаващиял, Агъуллал, Шаржавуллал, Ахъушиял районнал фольклордал ансамбльлал.
Циняв гьуртту хьуминнан буллуна Ккуллал райондалул, Дагъусттаннал Халкьуннал творчествалул къатлул чулухасса дипломру ва бахшишру. Фестиваль лахъи ларгуна ахттая махънин.
Репортаж хIадур дурссар
ХI. ХIусайновлул
