Журналистика, политика, педагогика, элму, литературалул критика, поэзия – вай гьарцагу арардаву ялун ливчунни Миясат Муслимовал яргсса гьунар ва аькьлу.

Дагъусттан Республикалул лайкь хьусса учитель, Сахаровлул цIанийсса премиялул номинант «Мусил байт – 2010» тIисса дунияллул халкьуннал дянивсса поэзиялул конкурсрал ва чIярусса цайми-цаймигу даражалул конкурсирттал лауреат, машгьурсса луттирдал автор, педагогикалул элмурдал кандидат, ДГУ-лул доцент Миясат Муслимовал цIа цакьнира цIакь хьуну дур республикалийгу, мунил кьатIувгу.
Ттигъанну ва бивтунни Дагъусттаннал кIулшиву дулаву хьхьичIуннай дайсса институтрал проректорну.

---

— Чув зурчагу, вила агьаммур даврия — учительнал пишалия, литературалия ина тачIав арх къабувцунна. Цукунсса дур хIакьину жагьилтурал литературалухсса бургаву.
— Цайнува цивппа ккалан гъира бусса жагьилтал чан­сса бур аьмну лавсун. Амма ттула мукунсса буруккин бакъая – оьрчIру луттирду ккалакки бан къахъанахъисса. Ца-кIива лу маслихIат барча, яла цивппа, цумур лу буккирча хъина тIий цIухлан бикIайва. Библиотекарттай бакъар художествалул литературалул луттирду. Совет заманнул луттирду кIулшиву дулаврил программалува буккан баву – му щала тIайласса ххуллу бакъая. Бакъар хIакьину тай луттирдал кIану бугьансса луттирду. Ттизаманнул чичултрал дянив аферисталгу чIявусса бур, цала цивппа машгьур буллалисса, цала луттирду ялув бухIлахIисса. ОьрчIансса лу­ттирду кIурчIулттувух буккан бан аьркинссар. Ми къалпсса лу­ттирдая буруччин аьркинссар.

— Миясат Щайховнай, ина къуллугъирттай зий бияв МухIу Аьлиев, МахIаммадссалам МахIаммадов, Рамазан АьбдуллатIипов бакIчисса чIуннардий. Ккалли барав инава паччахIлугърал чиновникнан?
— Иширайну на чиновникра. Амма на бакъара аьдатсса чиновник. ТалихIиндаран, дакъар ттуву паччахIлугърал чиновниктурал куннасса психология. Ттула кабинетраву тачIав къалахъара бакIчитурал суратру. Халкьуннан нава чиновник бушиву асар къахьун хIарачат бара. ТтучIан уххан ччима гассят уххай­ссар, на инсантал ялугьлагьи къабара. БакIчинал хьхьичI нава хъин ккаккан хIарачатрайгу тачIав къабивкIссара. Муниятура на чIявумур чIумал тамур чулий ливчIунгу лякъайсса. ПаччахIтурал дустурал сияхIраву на тачIав къабивкIссара.
Цала биялалул заллу цувасса инсаннан мудангу захIматссар къуллугъ бугьан. Амма ттул буруккин къабикIай нава крес­лолуцIа хьунссара тIисса. На ххарилгу бивчIавай школалийнмай зана шара. Яла ххирамур давугу мури. Кресло ттул анжагъсса зузи кIанур. Ттула хIурмат нава бан къашайсса чIумал ссан аьркинссар мукунсса къуллугъгу, оьрмугу. Къахьунссар ттуща ттула хIурмат ччанналун бувтун ялапар хъанан.
Ай, га АьбдуллатIиповлуйн къаччан бивкIун бур тIиссагу бур. Агарда на ци-бунугу тIий бухьурча, на му ттула аькьлу-кIулшилийра тIутIисса. Масалдаран, цивана на дунияллийх цIа ларгсса композиторнахлу, миллатрал пахрулунсса арснахлу махъ къабусан, ганал бюхттул­сса произведение кьюкьин бувсса чIумал. Цаманал пикрилух вичIи дишин къакIулсса бакIчитуран биччибакъассар общество хьхьичIуннай шаврил, республикалул ялун бучIантIимунил.

— Гимнрал суалгу кIицI лавгнавхьур. Лавкьу­ссарив му масъала ягу буссарив гимн зана дан­сса чаран.
— АьбдуллатIипов лавгун махъ цаппарасса инсантал чялиш бувккунни му суалданул ялув.
АьбдуллатIиповлун цичIав бувчIлай бакъая тIисса хIучча бувгьуну, тий-ший бацIан къааьркинссия лакран. Му жула жува хъяврин бавур. Чаллаевлул музыка ххуй бизайсса инсаннал циванни цала пикри къабусан? Халкьуннаву бусравсса инсаннах агьалинал вичIи дишай­ссар. КIилчин, цивана га произведениялуву дакIгу, рухIгу, захIматгу бивхьусса инсаннал дакIнийн щун бан? Ширвани Чаллаев так цайва акъая аьтIий, Дагъусттаннаща чIу зевххуну бия, лажин дарцуну дия. Ттуща къавхьуна, танал щихчIав вичIи къадишинтIиссар тIий, кьацI бавщуну тийнмай бацIан. Интеллигенциялул цила пик­ри къабусарча, жува ялавай багьну гьантIиссару. Цала бияла ккаккан бан аьркинссар. ХIакьину тIалавну бакъахьурча вил махъ ттуршра шинава тIалавну лякъинтIиссар. Ина дунияллия лавгун махъ бучIину лякъувча.
АьбдурахIман Адамовлул Композитортурал союзрал ва филармониялул зузалтрал къулбасру рартIсса чагъар хIадур бунни. Багьлай бур законодательнайсса сипталущал буккан Жяматийсса палаталийн ва Хъунисриннал советрайн. БакIчигу увчIуну, Правительствагу цIакь хьуннин ялугьлай буссияв. Умуд бур му даву дузрайн дукканссар тIисса.

— Ина бура Аьрасатнал Чичултрал демок­ратический союзрал Да­гъусттанналмур отделениялул хъунмур, Ккавкказуллал Чичултрал клуб­рал Дагъусттанналмур отделениялул хъунмур.Буси Дагъусттаннал Чичултрал союзращал­сса дахIаврия.
— ДахIаву уттинин цукун­чIавсса дакъассия. Уттинин талай буссияв. Дагъусттаннал Чичултрал союзрайсса тагьардануя бусласисса ттул статья бивщунни «Литературная Россия» кказитрай. Бюхъай цайми союзирттавугу мура тагьар дикIан. Ттул шеърирду ккаланшиврул хIакьину аьркинну бакъар царагу «Союзрал» рухсат, чичулт­рал членшиврул документ. ХIакьину шеърирду буккинсса сурсатру чIярур, ккалайгу бур, оьвтIийгу бур. На ца ттулашиврий бакъаяв талатиссагу. РГВК каналданий на дував «Литературный ковчег» тIисса 27 передача, Дагъусттаннал шаэртуран,чичултран хас дур­сса. Му передачалийн оьвкусса кьуния арулагу шаэр ия гьунар бусса, илданун кIулну бикIан лайкьсса. Амма тай цинявппа бия союзрал кьатIув ливчIсса, цавагу лу итакъабавкьусса. Ттул мурад литературалул процесс тIайла бакъасса иширттацIа, чапалшивруцIа марцI буккан банссая. Хъуни къуллугъчитурая цIарду дуллалисса луттирду — мурив литература? Чичултрал союз зун аьркинссар миллатрал гьунар бусса шаэртурал произведенияртту дунияллийн буккан бавриха, ми машгьур бавриха.

— Ттигъанну грекнал журналданий бувккунни вил шеърирдугу, вищалсса интервьюгу. Инавагу зана хьунна Грециянавунсса аьрххилия. Ча бакIрайн багьри вил шеърирду тихун.
— Р. ХIамзатовлул цIанийсса Хасавюрт шагьрулул библиотекалул директор Эльмир Якьубовлул хIарачатрайну.
«Русский мир» тIисса Москавуллал фондрал кабакьаврийну «Авангард» тIисса культура хьхьичIуннай даврил центрданул сакин дурсса «Многоликая Россия» тIисса фестиваль хьунни ттигъанну Грекнал хъуншагьрулий Афиннай. Му фестивальданий «Дагъусттаннал кьинирду» дансса проект хIадур дурну дия Хасавюртуллал библиотекалул. Ттущал Дагъус­ттаннаясса делегациялувух бу­ссия «Эхо гор» къавтIаврил ансамбль, мунил каялувчи Давудбаг ХIасанов, Дагъусттаннал лайкь хьусса артист Шамил Нагиев, шаэр Рима Исяева. Дуссия Бархъаллал тIахIунттал выставка. Ттул шеърирдугу тихун гьан бувну бия Эльмир Якьубовлул. Грекнан ххуй бивзун бия ттизаманнул буруккинтту бусса шеърирду. Грек мазрайн таржума бувну, бивщуну бур. Тайннал акт­риса Эвелина Арапиди ккалай бур «Ниттихасса», Дагъус­ттаннахасса ва Къапкъазуллаха­сса шеърирду.
Грекнал агьулданун кIул хьу­ну ччай бия Дагъусттаннал аьдатирттая. Тайннан мяйжаннугу ххуй дирзунни жула къавтIавуртту, балайрду, аьдат­ру. Жул хIурмат бюхттулну бия.

Барчаллагь,Миясат Щайховнай ихтилатрахлу. ТIайлабацIу баннав вин бигьа дакъасса давривугу, Дагъусттан машгьур буллалисса творчествалувугу.

Ихтилат бувссар
Зулайхат Тахакьаевал