Хъинну чансса бакъа къалякъинссар хIакьину миллатру, лакрал халкь кунма, щаллагу дуллу дунияллийх сахаватну кIама бивщусса, ппив хьу­сса.

Зура хIисав дара, Аьрасатнал паччахIлугърай махъра-махъ хьусса агьалинал переписрайн бувну, лакрал аьдад ккалли хьуну дур 180 азара инсан ушиврун. Минная цалла тарихийсса миналий яхъана­хъиминнал ккал тIурча, дур дурагу 20 процентрачIан дирсса-къадирсса.
Жунма кIулли лак яхъанай бушиву цайми-цайми билаятирттайгу – «гъансса» дазул кьатIувгу, «архсса» дазул кьатIувгу. Ва цIанасса жул лабизавугу хъунмурчIин Аьрасатнал кьатIувми лакрайнсса лабизавур.
Ванил ца яла хьхьичIунмур мураднугу хIисав буллай буру жула чIу, жула махъ, ссалам-ссайгъат хIисаврай, кувннан кув баян баву.

https://youtu.be/xdXG-mMclXY

Цалчинма-цалчин, баян буллай буру бушиву дунияллий жула ниттил мазрайсса, нюжмардий цал буккайсса, 16 лажиндарайсса, республикалул лаг­рулийсса, «Илчи» тIисса ла­кку кказит.
Ххирасса лак! Жун хъинну ччай бур зущал гъанну кIул хьун, цIакь дан жулла дянивсса дахIаву. Лабизлай буру гьарцагу ла­ккучунайн бакIра-бакIрах: тIайла букки жучIан виявасса хавар, буси жухь инава ци кIанттай уссарав, ми­кку миналул та ва цукун хьу­ссарав, часса бивкIссарив вила нину-ппу, ча нани­сса ду­ссарив вилла нясав ва м.ц. Жун хъиннура кьамулну дикIанссия, агарда бусласимунищал архIал ина жул редакциялийн тIайла дуккарча фотосуратругу – вилласса, вила нитти-бутталсса, бу­ттал буттахъалсса ва м.ц.

https://www.youtube.com/watch?v=RzqnOOCSWX4

Жун кIулли къачансса лак яхъанай бушиву Дянивмур Азиянаву, Азирбижаннай, Гуржинаву, Совет Союз лирну махъ батIул хьусса сайки циняв рес­публикарттай. КIулли мукунма биялсса лак бушиву Туркнаву, сайки цаллалусса шяравалугума диркIссар ти­кку.

https://youtu.be/orJruBi_EWY

Лак­рал миллатрацIунсса къяртри дикIан аьркинссар ХIабашнаву (Эфиопия), Яманинаву (Йемен).
ХIакьину жула Ватандалулгу, лакку мазралгу ялун биллалимур цума-цагу чантI увку­сса инсаннавун хIучI бутлатисса бур. Жунма аьркинну бур тачIав бакъачIин цачIун хьун, ца къювулий ялапар хъанан, лакку мазгу, лакку багьу-бизугу ххассал бансса ххуллурду ляхълан, жула миллатрал ялун пашмансса кьадар бучIан къабитан.

https://youtu.be/6MSMIGcEaDI

Цуманаща цукун бювхъурив, бацIияра «Илчи» кказитрал чIаравгу, бувара ка-кумаггу. БучIан буллалияра зува бусса кIанттайн «Илчи» кказит, зущава му буккин хъанай бунугу, бакъанугу. БикIуча му зул къушлий, зула мархха-ххун часса ду­ссарив хъамаритан къабитлати­сса, Лакку кIанттуясса хъамаличу хIисаврай.

Ябаннав зу Заннал!

Жул адрес:
367018, г. Махачкала,
пр-т Насрутдинова, 1а

e-mail: ilchi@rambler.ru
https://ilchi.info

Гл. ред 65-00-07
бух. 65-03-11

Руслан Башаев,
«Илчи» кказитрал редактор

https://youtu.be/eFKRj1egGkk