Октябрьданул 2-нний Дагъусттаннал БакIчи Владимир Васильевлул каялувшиврий хьунни Дагъусттан Республикалул Мюхчаншиврул Советрал батIаву.

БатIаврий ххал бивгьунни ДР-лийсса законну бартдигьаврил властрал федерал органналгу, Да­гъусттаннал законну бартдигьаврил властрал органналгу, районнал ва шагьрурдал органналгу республикалул бюджетирттавун налогру дучIан дуллалаврил хIакъиравусса масъалартту.

Микку махъ лавхъунни ДР-лул ХIукуматрал председательнал хъиривчунал буржру чIумуйну би­ттур буллалисса ХIажимахIаммад ХIусайновлул. Мунал тIимунийн бувну, республикалул агьалинал маэшат ххуй-хъин шаву дархIуну дур бюджетравун налогру гьарзану дучIан даврицIун. «Региондалул бюджетрал 104 млрд. къурушравату гьашину инфраструктура ляду­ккан дуван, ххуллул фонд хIисавну дакъа, ккаккан дурну дур 4 миллиардраяр чансса. Мунийн бувну, жуллами доходру гьарзану дучIан къадулларча, агьалинал оьрмулул даража лавай бан къахьунтIиссар», – увкунни мунал.

ХI. ХIусайновлул мукунма бувсунни бюджетравунсса доходру гьарзану дучIан дуллансса луртан жучIара душиву. Мунал кIицI бунни налогру чату дучIан дуллан аьркинссаривгу. Ихтилат хьунни мукунма республикалул паччахIлугърал хъус мюнпатну ишла дуллан аьркиншиврияту. Бувсунни ми давуртту цукун бартдигьлантIиссарив.

Республикалул бюджетирттавун налогру дучIан дуллалаврил хIакъираву ихтилат бунни ДР-лул налогирттал къуллугърал управлениялул каялувчи Гъазинур Апсалямовлул. Ихтилатирттах вичIи дирхьуну махъ Дагъусттаннал БакIчинал лаизаву дунни мюнпатну бартбигьлан цайвасса къуллугърал буржру: «Агарда зул, ттинин зий бивкIсса кунма, ттинияр тихунмайгу зунсса пикри бухьурча, ягу зунма бувчIлай бухьурча, зущара зулла даву дуллан къабюхълахъишиву, чичара даврия хушрай зува букьансса аьрза».
БатIаврий ххал бивгьунни ца­ппара цаймигу масъалар­тту.

ХIадур бувссар
ХI. Аьдиловлул