[dropcap]Ч[/dropcap]Iяру хьуну дур махъппурттуву Дагъусттаннал зунттавун ва республикалул дазул кьатIув туристътал ххилаххисса тур-фирмарду. Миннувух ца яла хьхьичIра-хьхьичIссава туристътурал дянив ца яла цIаларгмургу дур «Шангереев-тур» тIимур.Цала аьрххирдая, республикалийсса туризмалул иш-тагьардания ва мунил хIакьинусса масъаларттая бусласисса пресс-конференциягу хьунни итникьини «Дагестан» РИА-лий му агенствалул каялувчи Шамил Шангереевлущал.

---

З.АьбдурахIманова
Туризмалухун агьаннин, цIа ларгсса фотограф хIисаврай, Шамил чIун-чIумуй цалла суратирттал выставкартту дувайсса творчествалул инсанъя. Цала суратру рищун нанисса ирглийсса зунттавунсса ца аьрххилия махъ ваная утти хьуну ур ца яла машгьурма тур-оператор.
Шамиллул бусаврийну, гьашину вайннал фирма зий 4 шин хъанай дур.

«ЦIубакIрай жул турисътал бия так жула дагъусттанлувтал. ЦIана тIурча, жуламиннаяр гьарзану цайми регионная­сса бикIай. Цалчин бувкIмигу, кIилчин, шамилчингу Дагъус­ттаннайн ялагу зана къавхьуну къаличIай. Жула зунттах эшкьи хьунува ливчIру тIун бикIай.

Туристътал ххилаххисса жул маршрутру дуссар личIи-ли­чIисса: Сулакьрал къуманивун, Гъунив, Ххунзахъун, Дарбантлив, Шамиллул ва Ахъушиял районнайн. Уттигъанну тIитIарду Гуржиянавунсса, Азирбижаннавунсса ва Туркнавунсса маршрутругу»,-бувсунни ванал.
Байбихьулий зуруй ца-кIива аьрххи шайсса бивкIхьурча, цIана гьарца бигьалагай кьинирдай аьрххилий буккансса туристътал батIайсса бур.

[dropcap]Ф[/dropcap]ирмалул мяъна-мурадрах бурувгун, сакин дувайсса дур цирда турдугу, мисалдаран, тарихрал, экологиялул, дуки-хIачIиялул, оьрчIансса ва цаймигу турду.
«Тарихрал турданий, мисалдаран, жу жула туристътал буцару халкь ялапарвагу къахъанахъисса зунттал щархъавун, ккаккан бувару цуку-цукунсса шартIирдаву яхъанай бивкIссарив жула халкь. Экологиялул турданий тIурча, туристътал жу буцару неххал зуманив ягу вацIлувун, гиккусса ччюрк-цIинцI датIин. ОьрчIансса тургу, аниматортурайнгу оьвкуну, миннан тяхъану чIун гьан дан­сса журалий сакин дувайссар»,- тIий ур Шангереев.
Ванал мукунма бувсунни сайки мукьра шинал дянив цал тур-фирмалул 400 аьрххи сакин бувшиву ва 25 азара инсан ми аьр­ххирдай увцушиву.

Ванал бусаврийну, туристътурал дянив ца яла машгьурми аьрххирду Дарбантлийнмур ва Сулакьрал къуманивунмур бу­сса бур.
Вайннал фирмалул цала аьр­ххирдугу сакин бувайсса бур шинал чIумух бурувгун. Мисалдаран, тIабиаьтрая ябатIин къашайсса ссутнил чIумал лагай­сса бусса бур вацIри, мурхьру гьарзасса районнайн, гъинттул чIумал тIурча, щинну, нехру, жюружантту гьарзасса зунттал районнайн. КIинттул чIумал туристътурал язи бугьайсса бур Талги ва Ахъушиял райондалийсса «Чиндирчиро».