-Бизарну бакъарав вила зума-къирагърай, бачу жущал, Элисталий миллатирттал мазурдийсса СМИ-лул форум дурча,- оьвкунни ттуйн ттул дустурал — Дагъусттаннал журналистурал союзрал хъунама Аьли Камаловлулва цIанихсса политолог, аьлимчу, журналист Денга Халидовлул. Му мудангу ттул дакIнил хажалатрихха куну, архIал бивзра.

---

Элисталийсса форумрал цIа дия «Национальная пресса сегодня» тIисса Къалмукьнал Журналистурал союзрал хъунама Санал Шавалиевлул каялувшиврулу, щиривкIуну бия хъамал кьамул буллай.
Форумрал байбихьулий жущал хьунабавкьуна Къалмукь республикалул мукьра министерствалул хъуними. Бувсуна цала республикалий ва цала идарарттай дуллалисса ва дантIисса давурттая.

Къалмукьнал халкь Аьрасатнавух хIала бувххун 410 шин хьуну дур. Цайми миллатирттавух хIаласса хъиншивугу, оьши­вугу ккарккун дур. 1943 ку ши­­­ная 1956 ку шинайн бияннин ссибир бувну бивкIун бур. Му сававну цала мазрацIагу, культуралуцIагу шавай ливчIун бур. ЦIанакул республика ва миллат умудрай бур ялун бу­чIанмур чаннасса ва барачатсса лякъинтIишиврийн.Мунил барашиннугу чIярусса чIалай дур тIий бия махъ лахълахъими. Билаят сант дусса кIанай бушиву, хьхьирил зуманицI бушиву, аьвзалзаманнул ссигъа­сса курганну бушиву, гьай-гьай, тамахIгу, умудгу туризмалийнгу бур. Ми­ккугу кIицI лаганмур чансса дакъар. Республикалул аьрщи мяъданнал авадансса аьрщи душиву, тIабиаьтралгу караматсса душиву.

Форум цуппагу сакин бувну бия Кирсан Илюмжиновлул гьану бивзсса Сити-Чесс-Холл Шахматирттал чIаль­аьрдаву.Жул цалчинсса хьунабакьавугу дия мува Кирсан Илюмжиновлул Элиста шагьрулул дязаннив бувсса Шакьямуни Буддал мусил хурул — храмраву.(Золотая обитель Будды Шакьямуни). Жущал хьунаакьин рязи хьуна, (бякъайкьин оьруснай чичиннача). Его святейшество Шаджин лама Калмыкии, председатель Объединения буддистов Калмыкии, Почетный представитель Его святейшества Далай ламы в России, СНГ и Монголии Тэло Тулку Римпоче. Элисталийсса Золотая Обител кунмасса буддизмалул хурул ба­къасса бур цамур я Аьрасатнаву, я Европанаву. Шиккун чIявусса билаятирттая бучIайсса бур буддизмалул элмулул аьлимтал ва му элму лахьхьин ччими. Буддизмалул тIимунийн бувну, инсанннал рухI личIи-личIисса журалий цимилгу зана шайсса дур аьрщарайн.
Къалмукьнал халкьуннал буддизмалул дин кьамул дурну, тарих хIисаврай, хъунма хIал хьуну бакъанугу, цIана гай хъинну диндалухун багьсса халкь бия учин бюхъанссар. ЧIярусса дачIавурттайх лавгсса, кувннахун кув къюллалисса, терроризмалул аьйлилун дагьсса жула диндалучIа вайнналмунихун дахчилачисса, къарши дуклаки­сса цичIар дакъасса хханссия.

[dropcap]Ф[/dropcap]орумран сававсса миллатирттал мазурдийсса прессалул хажалатирттал масъалартту виттирикIин бувкIун бия Москавлияссагу биялсса делегация, Аьрасатнал Журналистурал союзрал хъунама В. Соловьев бакIчисса. Бия Госдумалул депутатъталгу. Къалмукьнал чулуха­сса Госдумалул депутат Марина Мукабеновал цила махъ къалмукь мазрай лавхъуна цал, ва баян бувна цила ниттил маз аьзизшиврул гьар кIанайгу, гьар мудангу цила махъ къалмукь мазрая байбишайшиву. Чялишну форумрал давривух гьур­тту хьуну ия Госдумалул миллатирттал иширттал комитетрал хъунама Илдар Гильмуттинов. Къалмукь республикалул бакIчи А. М. Орловлул цала мукъуву бувсуна, цува къуллугърай уссак­сса хIаллай, гьар шинах гьарцагу райондалийн ияйшиву, редакциярттайн уххайшиву.

Цавагу райондалул кказит лакьин къабивтшиву. Цува гьар мудан хIадурну ушиву ччимур изданиялул зузалащал хьунаакьин, интервью дулун. Амма, увкуна ванал, аьрасатнал централ СМИ — лул чулуха регионнахгу, регионнал прессалухгу къулагъас хъинну хьхьарасса дур. Билаятрал инсантуран регионнай хъанахъимуния, ххуймуния, хъинмуния чанну баллай, ккак­лай бур, куну.
БувчIлай бия, миллатирттал мазурдийсса прессалун хасъсса форум цуксса сийлий буллай бухьурчагу, ихтилатру гайва гай бушиву, аьрзарду гайва гай бушиву. Глобализация, урбанизация сававну шяраваллу дачIра дуклай, мазрал мина дух лаглай, оьрус маз ялтту буклай ниттил мазру дири-дирину бухлаглай бушиву ва м.ц.

Махъппурттуву прессалуву хъуннасса авара гьаз бувсса Мазурдил хIакъиравусса закондалиягу чIявусса бия ихтилатру. Думалул депутат И. Гильмуттинов му масъала политикалул журалийн кIура баен мабулларду тIийгума ия журналистурахь. «Президентгу, Думалул депутатталгу цIунилгу зана хьунтIиссар му закон ххал дигьаврийн. Хъирив лаянтIиссар. Мазурдий къия дур, амма масъала бигьасса ба­къар, чIун даххана хьуну дур. Гьарцагу оьрчIахьхьун конституциялул дуллусса ниттил мазрай дуклансса ва гъалгъа тIунсса ихтияр дуруччин аьркинссар тIиминнаяссара нагу. Амма анавар буклан аьркин бакъассар», — тIий ия депутат.

[dropcap]М[/dropcap]оскавлия увкIсса политолог С.В. Кротовгу кIирисса махъ лахълай ия, журналистурацIун акьлай. «Жула хIукуматран жула аьрщигу, мяъданнугу, жаннугу, жула оьрчIругу, жула аькьлугу аьркинну бур. Жува жуварив аьркинну бакъару». Амма жухьра гьарнахь дуссар ихтияр жула мазраягу, культуралиягу, жуявагу пахрулий бикIан. Жува буруччин аьркинссар жула мазругу, жула тарихгу, — увкуна.
Форум пахрулий «международный» тIий баян бувну бухьурчагу, цалсса дазул кьатIатумину бия так Китайнал Москавлив­сса «Синьхуа» агентствалул вакилтал.

Дагъусттаннал делегациялух, сивсуну учин бю­хъанссар, личIиссара къулагъас дия. БувчIингу захIмат ба­къар — чIаххул бур. Аьли Камалов гьарцагу батIаврий президиумрай ия. Цахьхьунма махъ буллувкун, ванал кIицI лавгна Къалмукьнаву 2000-нния ливчусса дагъус­ттаннал инсантал бушиву. Ми кIирагу республикалун хайрданунну зий бушиву ва миннайнугу халкьуннал дянивсса арарду цIакь хъанай душиву. Мазру ябаврил хIакъираву ваналгу увкуна: «Мазрал хIакъиравусса закондалийн» Дума цIунилгу зана хьун аьркинссар, хъирив лавну ххал дигьин аьркинссар. Жува цIана якъабарча, учкъуларттай оьрчIал ниттил мазру къалахьларча, му жунма жула оьрчIал хIалал къабитантIиссар» куну. Ванал бувсуна Дагъус­ттаннай 400-ния ливчусса изданияртту душиву. 14 мазрай пре­сса зий бушиву.

Гьай-гьайкьай, форумрал ахирданий чара бакъа наградарттугу дия. ДукIу печат­рал ва телевидениялул журналистурал дянив баян бувну бивкIун бия Къалмукьнал республикалиягу, гайннал агьалинаягусса хавардал конкурс. Ххюазарунния арулцIаллий ххюазаруннийн диллалисса къурушру дия премиярттангу. Жула Бурлият Токбулатовал каялувшиврулу­сса «Дагестанская правда» кказитрал очеркру лайкь хьуну дия яла хъунмур премиялун.

ЗахIматри учин, хьуссарив ци бунугу хайр ва форумраягу, ххи хьуссарив цавагу аргумент мазру буруччаврил чулухунмайсса. Амма журналистурал, Москавлия бувкIсса махъ нанисса къуллугъчитурал хьхьичI цал ттигу гьаз бунни ва агьамсса ва захIматсса масъала. Цала пикрирду цIакь бунни, ва тIайла бувккунни Москавлив, хIукмулул залунначIан жямну кьамул дурсса «Резолюция II Международного форума журналистов «Национальная пресса сегодня». Хьунни цIусса пишалул журалийсса дусшивур­тту, даврил дахIавуртту. Чансса бухьурчагу, хъинмунийнсса умуд ххи хьунни. Закондалул заллухъруннангу бувчIунни цуксса кьянкьану бацIан хIадурну бу­ссарив (ягу бакъассарив) халкьгу, журналисталгу цала маз буруччаврил ххуллий.

Вана вай пикрирдугу дакIний­ну пас хьуна форумрал агьлу. Умуд бур ялунчIилгу вара, гьар шинах датIлан куну икьрал дур­сса форумрайн бавтIминнал ихтилатру, гьашинуминнуяр ххари­сса, рязисса лякъинссар тIисса. Иншааллагь.
P.S. Махъунмай нани ххуллий (къалмукьнал, ххуллу­хъин тIисса мяъналий КIяла ххуллу чIа чай­сса бия) Денга Халидов, форумрал жям дуллай: «Ва даву гьарцагу чулуха жуламур республикалий дан аьркинну диркIсса давуя, инициатива жухьрая дикIан аьркинну диркIсса,- тIий ия.

Миллат­ругу, мазругу чIявусса, мукьттуршлийсса изданияртту дусса, ацIния мукьва мазрай пресса зузисса жула республикалий хъиннура сийлий дан хьунтIиссия ва даву. Жува, лачIун буккавур­ттахух, спортрахух лавгун, так бювчIунбиширдал цIакь кка­ккан буллалисса чIумал, къалмукь аькьлу-кIулшилул хьхьичIун хъит учин хIадурну чIалай бур. Жула тIабиаьт къалмукьналнияр ттуршлий аваданни. Хъамаллуран кка­ккан данмунил хIат-хIисав да­къар, жува курчIилну буру ми щурущи дуван»,- тIий ия.

ТIайлахьунссар ванал тIи­мургу. Амма тикку ца миллат бур, ца маз бур. Жуламур иш личIири. Жулагу чIярур дакI мяшсса ххуйшивуртту. Жуйва мяшссагу, гайва къалмукьная байбивхьуну, чан­сса бакъар. Так жула ххуйшивуртту ххи дуллан жувагу хIарачат бан аьркинни — спортравугу, элмулувугу, гьар чулухагу ххувну бикIан.

Качар ХIусайнаева