Ххирар ттун хъинну жула хъунмур никирал «оьрмулул дарсирдах» вичIи дишин. Миннан оьрмулуву ккавкмуния, бакIрачIан бувкIмуния мюрш бивкIун буккултрахь бусан къабюхъарчагу, ттуламур дакIнил ца мурцIув салкьи къавхьуну къаличIай.

Ттула даврил цIанийсса кIяла-лухIи суратирттащалсса альбомругу, гайннуйсса халкьуннал симанну ва кьадардугу дакIнийн бичлачисса вай хьунабакьавурттаягу тIааьнсса асардал видурцIусса, ца ттунналусса насихIатрал дарсру шай.

---

Залму АьбдурахIманова
Ванияр 58 шинал хьхьичI ХьурукIуллал 7 шинал школалул бухкIуллийх сивсуну ша лавсъсса АхIмадова Къисттаман МахIаммадлул душ хIакьинусса кьинигу МахIачкъалаллал 36-мур школалий учительтуралгу, дуклаки оьрчIалгу хъунмасса бусрав-хIурмат буну зий бур. Ва бур цила оьрчIниява язи бувгьусса учительнал пишалийн хаин къавхьусса, цимирагу никирал хIакьсса тарбиячи.
Бувну бур Къисттаман 1938 шинал Вилттащиял шяраву. Дяъви байбишин хьхьичI шиннардий чIивисса Къисттаманнущал ванил нину-ппу Ураллайсса Златоуст тIисса шагьрулий ялапар хъанай бивкIун бур.

Дяъви байбивхьусса гьантрайва ванил ппу МахIаммад щар­сса ва душ Дагъусттаннайн биян бан ххуллийн увккун ур. Къис­ттаманнул бусаврийну, буттал миналийнсса вайннал ххуллу Дянивмур Азиянавух сайки мукьва зуруй лахъи лавгсса хьуну бур. Мукьва зурул мутталий вайннан муххал ххуллул вокзаллай къа­ккавк къаливчIун бур, ккарккун дур, дяъвилул цIараву бакъанма, мунил яла оьмур сиччагу – захIматсса щавурду дирминнал дазу-зума дакъасса эшелонну ва миннал къювулийсса леххаврил чIурду.

[pullquote]Уттинин цила бивхьу­сса захI­матрахлу Къисттаман МахIам­мадовна лайкь хьуну бур чIярусса хIурматрал грамотарттан, медаллан ва хIурматрал лишаннан.[/pullquote]
Ахиргу биян бувну кулпат­гу цала ниттичIан Вилттащав, МахIаммадгу лавгун ур дяъви­лийн. Талай ивкIун ур яла Ста­линградрачIасса ва Орловско-Курскаллал ккуртлуйсса талатавурттаву. Ччаннайн кIусса щаву диярчагу, ххувшаврищал занагу хьуну ур шавай.

Дяъви къуртал хьусса шинал Къисттамангу Гъумучиял школалийн 1-мур классравун лавгун бур. Вай чIунну дакIнийн дичлай, хIурматрай буслай бур ва цила цалчинсса учитель Учурханов Оьмария, Магьижамал ва Ибрагьим Чалабовхъая, СалихIат ва АхIмад Шахшаевхъая, Эльза ва Аьвдуллагь Парамазовхъая, МахIаммадрасул Къажлаевлуя ва Нураттин Маммаевлуя.
«Нураттин МахIаммадович­лул ттухьра дирхьусса астрономиялул дарсру хIакьинугу дакIния къадуккай. Хъамарагу къаритай ганал хьхьунил чIумал цIурттал дурцIусса ссавнилу жул кла­ссрахь дирхьусса дарсру. Га ия Заннала учительну зун ляхъан увсса инсан», — дакIнийн бутлай бур Къисттаман.

ХIурматрай дакIнийн бутлай бур ва цихьра Гъумучиял школалий дарсру дирхьусса оьрус миллатраясса учительталгу: Хамзина Нина Георгиевна, Альтщулер Аделаида Яковлевна, Усачева Галина Никифоровна, Мамедова Галина Исмяиловна.
Оьрус мазрал учительнал пишагу Къисттаманнул язи бувгьуну бур цихьра дарс дихьлай бивкIсса Магьижамал Чалабова ххуй бизлай. Гъумучиял школагу марцIсса ххювардай къуртал бувну, 1955 шинал дуклан бувххун бур ва ХI.ЦIадассал цIанийсса институтрал филологиялул факультетрайн. Школалийва ххуйну дук­лай бивкIсса ванин ши­ккугу бигьану бивкIун бур дуклан. Ду­ккаврищал архIал чялишну гьур­ттуну бивкIун бур Къисттаман институтрал оьрмулувугу. 1957 шинал комсомол кьюкьравух цищала дуклакиминнащал лавгун бур Къазахъисттаннайн целиналий­сса бакIлахъия датIин. Лайкь хьуну бур ЦК комсомолданул чулухасса лишандалун ва грамоталун. Гъинтнил каникуллайгу мува куццуй республикалул личIи-личIисса предприятиярттайн зун лагайсса бивкIун бур студентътурал кьюкьравух.

1960 шинал институтгу къуртал бувну, Къисттаман зана хьуну бур Лаккуйн. ЗахIматрал ххул­лугу ванил байбивхьуну бур ХьурукIуллал школалия. Шикку 5-6-ми классирттаву оьрус мазрал ва литературалул дарсругу дихьлай, хъунмур пионервожатайну зий бивкIун бур. Ва бувчIуну бивкIун бур РК ВЛКСМ-рал бюрорал вакилнугу. 1962 шиная 1981 шинайннин Къисттаман АхIмадова Хъунайннал 8 шинал школалий зий бивкIун бур. Ва школалул директорну зузисса шиннардий, жагьилсса каялувчи хIисаврай, ДАССР-данул Просвещениялул министерствалул ванин кабакьу бувайсса бивкIун бур. Вава школалий Къисттаманнун нясив хьуну бур цила оьр­мулул дусгу лякъин. Щар хьуну бур щала райондалий хъинну бусравну ивкIсса, вава школалий зий ивкIсса химиялул ва биологиялул дарсирдал учитель, Шуниннал шяраватусса АхIмадов Шихамир ХIажимахIаммадлул арснан. Ваналгу сайки 20 шин дурну дур Хъунайннал школалул директорну зий. Ванал лахьхьусса дуклаки оьрчIру – элмурдал доктортал, кандидатътал, полковниктал, хIакинтал, экономистътал, хIакьинугу буссар дахIаву дуну, цала учительнал цIа хIурматрай зумух ласлай.

Уттинин цила бивхьусса захI­матрахлу Къисттаман МахIам­мадовна лайкь хьуну бур чIярусса хIурматрал грамотарттан, медаллан ва хIурматрал лишаннан. Ва бур ДР-лул кIулшивуртту дулаврил аралул отличник ва лахъмур даражалул учитель. Школалий ба­къасса, оьрмулухун ва дачин дурну бивкIун бур жяматралми давурттугу. Хъунав зузисса чIумал, мисалдаран, ва бувчIуну бивкIун бур Хъаннил советрал хъунмурну.
МахIачкъалалив бивзун махъ Къисттаман зун кьамул бувну бур 9-сса сменалул школалийн (СШРМ). Най буна ванил дарсирдан лайкьсса кьимат бивщуну бур, ва хъиривмур шинал ванийн тапшур бувну бур парторганизациялул секретарьнал къуллугъ. Хъиривми шиннардийгу профкомрал хъунмурну бивтун бур. Ванил тIиртIу дарсру, класс­рал кьатIувсса мероприятияртту шайсса диркIун дур лахъсса даражалий. ЧIярусса шиннардий зий бивкIун бур УПК-лул хъунмурну ва школалул методистну.

Шихамир ва Къисттаман АхIмадовхъал хъунигу бувну, чивун буккан бувну бур кIия арс ва кIива душ. Вайннува Издаг тIимур душ, нитти-буттал пиша язи бувгьуну, математикалул ва информатикалул учительгу хьуну, зий бур МахIачкъалаллал 13-мур школалий завучну. Ибрагьим тIима арс ур строитель, Камил тIима арс, «Худграф» къуртал бувну, заргалну зий ур ва Аьзиза тIимур душ экономистну зий бур.
Учительнал кьини барча дуллай буру ва учительтурал кулпатрахь! ЧIа учин ччай бур Къисттаман ва Шихамир АхIмадовхъан цIуллушиву ва ххуй-хъиншивуртту. Зу мукун бусравну ва хIурматрай личIаннав зува тарбия бувминнал дакIурдиву.