«Человеческий капитал» проектрал давурттал лагрулий вай гьантрай Гъуниннал шяравун бивунни республикалул литературалул ва магьирлугърал ишккаккулт­рая сакин хьу­сса «Твор­чествалул десант».

Миннавух бия: шаэр Тубхат Зургалова; ДР-лул магьирлугърал лайкь хьу­сса иш­ккакку Рамазан Фаталиев, художниктурал выставкардал залданул директор Амирхан МахIаммадов, искусствовед Гулизар Султанова; Лакрал театрданул каялувчи Бадрижат МахIаммадхIажиева, хъунама режиссер Аслан МахIаммадов, директор МахIаммад ХIусайнов ва артистал.

Хъамал бусраврай хьунабавкьуна Гъуниннал райондалул Магьирлугърал къатлул хъунмур ПатIимат Абакаровал.
Дагъусттаннал халкьуннал тарихрал ва магьирлугърал ца­сса ирсирая буслай, Тубхат Зургаловал кIицI лавгуна аьдатсса культурардайнусса дахIавурттал агьамшиву, бувккуна цила шеърирду.

Гулизар Султановал бувсуна Дагъусттаннал театрдал тарихрая, хаснура чIурчIав дуруна магьирлугърал ирс ябан Лакрал театрданул дуллалисса давурттай.
Ккаккан бувуна «Камаллул Башир» ва «Оьтту ва макь» тIисса спектакллавасса парчри. Луиза Шагьдиловал ва Саният Рамазановал увкуна лакрал халкьуннал балайрду. Дагъус­ттаннал хьхьичIунсса композитортурая, хаснува Гъуниннал райондалия бувкминная, бувсуна Рамазан Фаталиевлул. Рурцуна цала макьаннугу. Да­гъусттаннал Художниктурал союзрал выставкардал центрданул даврия бувсуна Амирхан МахIаммадовлул.