Сентябрь зурул 23-нний 90 шин хьуссар щаллагу дунияллийх цIа ларгсса аьлимчу, РАН- далул член-корреспондент Рауф Мунчаевлун.Ванал юбилей хIисаврайсса шадлугърал мажлис хьунни ларгсса ххуллункьини Археологиялул институтраву.
ПатIимат Рамазанова
Мероприятие дачин дурнугу ия кIицI лавгсса институтрал директор, тарихрал элмурдал доктор, академик Николай Макаров. Ванал кIицI лавгуна дунияллул археологиялул элму Рауф Мунчаевлул хьхьичIуннайгу, машгьургу дуршиву. Бувсуна юбиляр барча уллалисса телеграммартту дуркIшиву Аьрасатнал Президентная, Ингушетиянал республикалулБакIчиная, Азирбижаннал элмурдал академиялия, цайми-цайми чIявусса идарарттая. Институтрал аьдатрайн бувну, Рауф Мунчаевлул «Месопотамия аьрасатнал экспедициялул хъиривлаявурттал дунияллий» тIисса элмийсса доклад бувна.
АрхIал зузиминнал ва учениктурал юбилярнансса бахшишран итабакьин хIадур бувну бия мунал элмийсса захIматирттал лу, му луттирал цалчинсса экземпляргу пишкаш бувна цанма авторнан. ЧIяруя даврил уртакьтурал ва элмулул кьадру кIулминнал Рауф Мунчаевлун хIадур дурсса бахшишру. Даврил уртакьтуращал архIал юбиляр барча уван бавтIун бия чIявусса дагъусттанлувталгу: профессор Арсен ХIусайнов, элмурдал доктор, 1-мур ранграл капитан ХIажи Аьлиев, профессор МахIаммад Оьмаров, Совет Союзрал Виричу, летчик-космонавт Муса Маннаров ва цаймигу цIанихсса инсантал.
