Ттул пикрилий, оьрмулул бугьараминнан, миннал буслай, жагьилминнангу кIулну бикIантIиссар Хъун дяъви байбишин хьхьичIсса шиннардий хIукуматрал жула районнал колхозирттахьхьун дуллуну диркIшиву Бабаюртуллал ва Бажиганнал авлахъирттайсса къутанну, хъуру дугьлан ва ятту-гъаттара ябуллан, зунттаву дугьайсса аьрщи чансса душаврийн бувну.
Ми хъуруннайсса аьрщараяту жула захIмат ххирасса инсантурал дяъви хьун хьхьичIгу, дяъвилул чIумалгу, яла махъсса шиннардийгу хъунмасса мюнпат ласлай бивкIссар. Цаппара колхозирттал къутаннай цIанакулгу шяраваллурдугума хьуну дур.
ЧIярусса хозяйстварттай яттихIухчалтну биялсса дарги бивкIшивугу мяйжансса зат бур. Ва хъун дакъасса ттула макьалалий ттунгу ччан бивкIунни ЧIарттал къутан зузи дурния шихуннай махъсса шиннардийнин гикку зий ивкIсса, цIана шагьрулий ялапар хъанахъисса, даргиричу Шяъван ЖахIпаровлуя ца-кIива махъ учин.
Кувннащал кув кIул хьун, дунияллул цIу-цIусса хаварду баян, цIуллушиву цIакь дан, муна-танал маслихIатирттах вичIи дишин, гьутру-ттиликI кислородрал дуцIин дан бакъа чара бакъасса кIану бур шагьрулул пляж. Цимигу ацIрахъул шинну хьунни, интту гьава гъили шайхту, кIюрххил, ссят ххюнний, гикку лакрал арамтал батIайсса ккурчIа сакин хьуну.
Пляжрай лакрал арамтуннал ккурчIа бусса бур тIий бавну, увкIун ия гиккун Шяъвангу. Гьаманки, га ккурчIавра нагу кIул хьусса мунащал – цукунчIавсса цамур миллатрал лугъат хIала бакъа, марцIну лакку мазрай гъалгъа тIутIисса даргиричунащал. Чансса гъалгъа байхтува, га ттун салахI ивзуна. Мунияту ганащалсса ттул ихтилат лахъи лавгуна.
Шяъван увну ур 1924 шинал Ахъушиял райондалийсса Цугни тIисса шяраву. Ванан цIана дур 94 шин. Амма ванан щилчIав къадулунссар 70-ннияр ххишаласса шинну. Занакьулушингу жагьилнал куннасса дур, лажиндаравугу вари чинсса жигдатIру дакъар. Так чIу баяву ва янин чани лагь хьуну бур мадара.
Шяъван буслай ур, оьрмулул 9-10 шин хьусса чIумал, цува буттащал архIал ЧIарттал шяравун букансса ччатIул хъирив лавгун ивкIшиву. Хъамаллувранний кIива-шанма гьантта хьувкун, бувчIуна, тIий ур Шяъван мяйжаннугу ЧIарттал жямат ххуйсса бушиву.
Ппугу шавай лавгун, цув авцIуссара тIар жяматрал бюрчурдичIа, багьлун гайннал бивхьусса чантайгу ласлай. Гьай-гьай, цIу бутIуй гьаксса захIматшиву дия тIар гьарцаннангу. Цаппара шиннардий бюрчурдичIагу ивкIун, яла, жагьилшиврувун увххукун, колхозрал яттичIа ивтун ур.
«АцIния мяйра шин хьусса чIумал на кулпат бав, буцав щарну чIаххуврайсса, ппугу аьпалувух ивхьусса, ПатIимат тIисса душ. Къутандалийн лаглай, шавай зунттавунай яттищал укIлай, най бия оьрму. Яттил ххуйсса лургъишинна хьуншиврул, ттун бувчIуна, чIиру буллай байбишайхтува, гайннун буччинсса накI дикIан аьркиншиву, ттардахагу багьайсса аякьа дан аьркиншиву, концкорма буллай, цила чIумал щин хIачIан буллай», — тIий ур ва.
ХIухчуну зузиссаксса хIаллай цацIунма цIакь бувсса 500-600 хIайвандалия гьарца шинал пландалийнияр ххишаласса лургъишиннагу ласайсса диркIун дур ванал. АцIра шинай бригадирсса чIумал, ванал бригада райондалий лув-ялув ца-кIира шинал хьхьичIунсса бригадану ккалли бувну бур. Яттил хIухчушиву кьадиртун махъ Шяъван гъаттарал хIухчуну ивкIун ур. Къутандалийсса оьллал доярканугу ванал кулпат ПатIимат хьхьичIунну зий бивкIун бур. Ванияр 11-12 шинал хьхьичI аьпалухьхьун лавгсса цала кулпат дакIния буклай бакъар, муксса ххуйсса хасиятрал инсан буссия тIий, къуману ур Шяъван.
Шяъваннулгу, ПатIиматлулгу дянив мукьва душ, мукьа арс хьуну бур. КIия арс аьпалувух ивхьуну ур, ца хьхьирийн оьвкьун, цагу – къашавай хьуну. Кулпатрал ялун дирсса, жагьилну унува, кIия сагъ-саламатсса арснацIа хьусса дардисан, ялун дирсса хъуннасса оьшиву ссавурданий дурхIуну дур Шяъваннул. Му чIумал щарссамур ахиратравун ларгун диркIун дур. Ялун чIалан цичIав къавхьусса куна занакьулу хъанай унугу, вивату щавари хьусса куна ияв тIий, мукIру хъанай ур Шяъван.
Дин-чак дусса, Заннайн иман дирхьусса бусурманчугу ур ва. ЧIарттал жяматрал ва цала шяравучу куна, ваналгу ЧIари цала шяравалу кунна ккалли дай. Совет заманнал чIумал ва колхозрал правлениялул членнугу, Советрал депутатнугу цимилагу увчIуну ур, цала буржругу багьайсса куццуй биттур байсса бивкIун бур. Оьрмулий ванал щищалкIуй рагьну дакъар, хатир ливчIун бакъар.
Ванал оьрчIангу, душварангу лакку мазгу, даргири мазгу кIулну бусса бур. Арсурвавралгу ЧIаратусса душру бувцуну бур, душругу ЧIарттал жагьилтуран хьуну бур. Миннал кулпатирттавугу оьрчIругу, оьрчIал оьрчIругу хьуну бур.
На Шяъваннухь тавакъю бувссия, мукун лахъисса оьрму бутаншиврул ина виятурасса ва макьала ккалаккиминнахь цукунсса маслихIат банссия куну.
Ванал увкуна: «Жула лакрал буссар ххуйсса учала, ссавур – ятIул мусири тIисса. Гьарца ишираву ссавур аьркинссар, цалчин. КIилчин, щийчIав аьй-бювкьурду буллан, цайми кьадар буллан къабучIиссар. ОьрчIан, жагьилтуран кIулну бикIан аьркинссар хьхьичIва-хьхьичI нитти-бутталгу, учительтуралгу хIурмат бан, гайннал тIимур лиян къабитан, кумаг аьркиннан кумаг буван».
ХIурмат лавайсса Шяъван, дакI авадансса, уздансса даргиричу-лаккучу, яаннав ина Заннал вания тинайгу рахIму-цIими ялттуну!
Гъаза Гъазаев
