[dropcap]О[/dropcap]ктябрьданул 21-нний жулла республикалий кIицI ларгунни Дагъусттаннал Культуралул ва мазурдил кьини.
Му иширан хас дурсса хъуннасса байран хьунни октябрьданул 22-нний Дагъусттаннал паччахIлугърал университетрал филологиялул факультетрайгу.
Бадрижамал Аьлиева
Ва байрандалийн хIадур хъанай филологиялул факультетрал студентътурал гьантри бувна, миннан кумаг буллай бия Дагъусттаннал мазурдил кафедралул муаьллимтал. Му хIаллай бувсса захIматрал ккаккияну хьуна «Дагъусттаннал миллатрал майдан».
Микку студентътурал ккаккан дуруна жулла республикалул миллатирттал багьу-бизулул, аьдат-эбадатирттал, канил касмурдал аваданшиву.
Майданнив бивуна ДГУ-лул ректор Муртазааьли Рабаданов, проректортал МахIаммад ХIасанов ва Мадина МахIаммадова, ДГУ-лул Профсоюзрал организациялул председатель НухIкьади Рабазанов, Яруссаннал театрданул директор МахIаммадрасул МахIаммадрасулов.
БавтIми байрандалущал барча буллалисса ихтилат бувна филологиялул факультетрал декан Шабан Мазанаевлулгу. Мунал кIицI лавгуна ва байрандалун хасну буллалисса майдан факультетрал хъин аьдатирттавасса ца хъанай бушиву.
Студентътурал цалва-цалва мазурдийсса балайрду, назмурду, сценкартту хIадур бувну бия. Гьарца миллатрал майданнив дия нахIу дукрарду, миллатирттал мазурдийсса луттирду, ичIаллил матахI, тахIни-кIичIу.
Лакрал жагьилтурая тIурчан, гьашинумур майдандалувух гьурттуну бия филологиялул факультетрал оьрус ва дагъусттан отделениялул 1-3-ми курсру. Дурну дия лакку дукрарду: ккунукрал ххункIру, нисирал буркив, аьрайн гьавккури, къячIив, кIюлаччатI, натIухI, дукьрахIан ва м.ц. Бия музыкалул инструментру: мандолина ва ччергъилу. Концертралмур программагу дия авадансса.
