Федерал ФОМС-рал вакилтал Дагъусттаннайн бувкIунни ДР-лул ФОМС-рал давурттал мюнпатшиврул хъирив лаян ва даврил уртакьтуран методологиялийнусса кумаг буван.
Аьрасатнал ФОМС-рал зузалт Дагъусттаннай зунтIий бур ца зурул мутталий. Нечепоренкол бусаврийну, миннал зузалтрал ххал бигьинтIиссар Дагъусттаннал ФОМС-рал бухгалтериярттал ва юридийсса документру. Яла миннал кIанай зунтIиссар Аьрасатнал ФОМС-рал цаймигу пишакартал ва шинал ахирданийннин.
Миннал ххал бигьинтIиссар Дагъусттаннал фондрал бюджет, паччахIлугърал гарантиярттал программартту. КутIану бусан, комиссиялул ххал дантIий дур циксса арцу харж дурну дуссарив цIуллушиву дуруччаврил давурттан.
Микку хъунмурчIин хъирив лаянтIий бур циксса арцу харж дурну дуссарив цивппа заллусса азарханардал давурттан. Нечепоренкол тIимунийн бувну, шиная шинайн тIиссакссагу, ФОМС-рал системалий цивппа заллусса азарханарду гьарза хъанай бур. 2016 шинал ми бивкIссар 74, 2017 шинал – 90, 2018 шинал тIурча – 124 азархана. Миннул агьалинан дуллан аьркинссар цаппара украсса медициналул хIаллихшинну. Миннул хIакъираву чIявучин ттигу кIулну бакъар. Ми бартдигьиншиврул къашайшалал, страховой полисращал лавгун, тIалав дуван аьркинссар цанна ккаккан дурсса хIаллихшинну.
