Ларгсса арвахIкьини «Бургъил зума» тIисса республикалул оьрчIал лагерьданий хьунни Дунияллул халкьуннал жагьилтурал динийсса 5-мур форум. Шикку гьуртту хьунни ДР-лул ХIукуматрал председательнал хъиривчунал къуллугърай чIумуйну зузисса Рамазан Жяъпаров, СКФО-лийсса Аьрасатнал полпреднал федерал инспектор Алексей ХIасанов, Дагъусттаннал динийсса идарарттащал зузисса комитетрал хъунама МахIаммад АьвдурахIманов, муфти АхIмад-хIажи Аьбдуллаев, МахIачкъалаллал ва Грознайлул архиепископ Варлаам, Дагъусттаннайсса ягьудинал ккураннал Советрал хъунама Валерий Дибияев ва цаймигу бусравсса къуллугъчитал, динийсса идарарттал вакилтал.
П. Рамазанова
Рамазан Жяъпаровлул кIицI лавгунни шаннагу диндалул агьлу республикалий бавкьуну, нахIуну ялапар хъанай бушиву.
«РувхIанийсса тарбиялул, мяърипатрал гьанурду цIакьсса бухьурча, жущава жулва оьрчIал бучIантIимунийн вихшала дишин хьунтIиссар», — увкунни ванал.
Муфти АхIмад-хIажи Аьбдуллаевлулгу кIицI лавгунни динийсса идарарттащал зузисса комитетрал вакилтал хъуннасса даву дуллай бушиву шаннагу диндалул агьлу кувннащал кув бавкьуну яхъанахъаврил ххуллий.
Валерий Дибияевлул бувсунни дуклаки оьрчIру экскурсиярттай бучIайшиву синагогру ккаккан, динийсса байранну дуллалийни, чIарав бацIанмигу чан къашайшиву.
МахIаммад АьвдурахIмановлул кIицI лавгунни шиная шинайн гьаз хъанай душиву динийсса форумрал сий, республикалул циняв районнаясса хъамал бакъассагу, цайми республикарттаясса ва кьатIаллил билаятирттаясса, Индиянавасса, Гуржиянавасса, Палестиннаясса ва Азирбижаннаясса вакилталгу гьуртту шайшиву.
Форумрай мукунма ихтилатру бунни Аьрасатнал бусурманнал рувхIанийсса мажлисрал председатель Альбир Кргановлул ва «Исламрал культуралул, элмулул ва кIулшивуртту дулаврил фондрал» директорнал хъиривчу Руслан Волковлул.
