Цаппара хIаллавату жун итадаркьуна Бухаралив базагу, конторагу бансса 300 азарда къуруш арцул. Нава хъирив ивзун, бансса кIанттугу личIи бан бувссия – гьарцагу чулуха хIалусса, бавкьусса кIанттай, ччимур чулийнмай гьан-бучIан бюхъайсса трассалул чIаравгу, шагьрулучIан гъаннугу.

Укунсса журалул объект цайминнал сайки шанна-мукьра шинай байсса чIумал, на, гьарцагу данмунил-дитанмунил чIарав нава авцIуну, дурну, ца шинавату чулийн ду­ккан дурссия. Дуллалигу був­ссия гьарца зат багьайсса куццуй, фундаментраяту байбивхьуну, магъуйн бияннин. Къатри даврил ишираву на за кIулсса ушиву бувчIусса СМУ-лул начальник Шаркаевлул на ивтунав сайки стройкалул ялув ацIан. Мукунна ганаща на ихтияргу ларсъссия га объектрацIунсса щинал хIавз (бассейн) щалва ттула проектрай нава бан итансса.

На хIавз буллай сукку хьу­сса чIумал, къаршину увккуна прораб. Га лавгун ия трестрайн аьрзирай, заказчиктал подрядчиктурал давривух хIала бухлан бикIайсса иш му ча дурксса, цукунсса аьдатри тIий. Амма на кьянкьану авцIуссияв, зу му хIавз бан нанисса куц ттун кьамулну бакъар тIий. Хъунама инженерну уссия ца аьсатIин адамина. На уссияв га ттухлува ацIанссар тIий, умудрай. БувчIин бувссия ганан ттунма бассейн бувну ччисса куц. Амма гагу къаавкьуна ттуцIун.

Махъсса заманнай Бухаралив бувсса циняв ба­ссейнну бия уруган къашай­сса, лазикъалавкьусса, цивппагу чIявуми бия щин вив къадугьлагьисса. Цахъи чIун лях ларгун махъ тава Шаркаевлул ттухь маслихIат бувна хIаллих зий айихьу куну. Ттун гьану дия танал ихтияр. Айивхьуссияв буллай. Аьркинссаксса куртIшиврий бульдозерданух дуккан дур­ссия котлован. ЧIангу ххуйну кьа дурну, дянивух лавай муххал турбагу бацIан бувну, бивчуну лагмава къун ва ххюл даркьуссия бетIондалул кIюласса къат. Яла чIанулух даркьуссия арматуралул къери, му къерттарал лагмарагу, центрдания саргъунсса манзиллугу бивтун, итабавкьуссия арматуралул щяпри лавай. ХIасил, ттула бакIраву нава хIасул був­сса циняв комбинациярттугу ва хIисаврттугу ишла дурну, бувну бацIан був­ссия аьнтIикIасса бассейн, цайминнуха бувагу къалавхьхьу­сса. Мунил ма­гъину хъанахъисса, муххал щяпрая щавшсса саргъунсса къуппалул ялттугу итадаркьуссия ганиннинма бувгьуну бивкIсса лухIитIутIул къяртри.

Объектрал сайки щалла территориялийхгу хьун бувссия хъункIултIутIал исвагьисса аллеяртту. Бувгьуну буссия мукунма 450 сунуврал къатIа. Базалул щалла аьрщарайх, щатIи-щатIив хьуну, экьиларгун дуссия ацIния ххюва журасса лухIитIутIул къюмайртту.
Бигьалагай кьинирдай ги­ккун пикникрайн батIайссия жул зузалт. Итадакьайссия гава къуппалул журалийсса фонтан. Ци кIиришиву духьурчагу, га фонтандалул чIентIал кумаграйну сакин шайва лагмара хъинну тIааьнсса ва дюхлулсса микроклимат.
1982-кусса шинал кIива автомашиналий Ташкантлия бувкIуна киносурат ласайсса бригада, ва сакингу бувна ттуясса ва дурмуниясса киножурнал. Тайва гьантрай кказитрай бувккуна «По законам красоты» тIисса ттун хас бувсса хъунма­сса статьягу.
Яла, на та даврия лавгун мукьахгу, чирчуну дия кказит­рай та ххуйшиву сакин дан хьхьичIма директорнал бивхьуну бивкIсса захIмат кIицI буллалисса, та ххуйшиврий тамаша буллалисса, Бухара шагьрулул чIалачIиндарацIун та архитектура даркьуну душивриясса макьала.

ХIакьинусса кьинигу Бухара шагьрулул каялувчитал кьасттирайнма бусса бур та комплексрая турбаза буван, дазул кьатIувсса инсантал кьамул буллансса кIантту хIисаврай, мунийну лайкьсса мюнпатгу ласлансса умудрай.
1981-ку шинал педагогикалул институт къуртал бувсса ттул чIивима арс увцуна армиялийн ва Евпаториялий курсру бувккуну махъ га агьуна Термез шагьрулийсса ракетарттал частьравун. На ивссияв ганачIан, гайннал часть дия Аму-Дарьялийх Авгъанисттаннал чулийнмай бивхьусса ламуяту арх бакъа­сса кIанттай. Ттухь, гьай-гьай, дуссия цаппара коньякругу. ХIаписартурал на гьаксса хъинну кьамул увнав, ккаккан дуруна ттун цалла хозяйствагу, так ца ракетартту личIаннин.

Муния махъ, нава Бухарнаву усса чIумал , арсная бувкIуна чагъар, цува Самаркьаннай­сса ракетарттал девизиялул штаб­райн уцинсса тIалавшин дан бува тIисса, акъахьурча институтраву лавхьхьумур, гьарзад хъамабитан най бур тIисса. Лавгун Самаркьаннайн, лякъав штаб. Ялугьлан ивкIра къапулул хьхьичI штабрал начальник учIаннин, мунахь нава кьамул ува учиншиврул. Ахиргу увкIуна му – Савицкий тIисса полковник. Нава цу уссаривгу бувсун, тавакъю бувссия кьамул ува куну. Ххал арча, та ивкIун ия Светлана Савицкаял уссу – космонавтшиврий жунма цинявннан кIулсса, бавсса. Миннал ппу усса ия поляк, нину – аьсатIин щар. На бувсъссия танахь кIира шин зиялун ларгун къаччисса арснал тагьардания. Му масъала цала чIарах цукунни бувксса куну, оьвкуну подполковникнайн, бувккуна танахь Термезлив гьан бансса приказ, пулан­сса инсан Самаркьаннайн тIайла уккира тIисса ва нани ххуллий буттачIан Бухараливгу иянсса ихтияр дулара тIисса. Нава кIура аеннин ттун арс лявкъуна жула къатрал хьулух.

На ялагу лавгссияв тава полковникначIан, танал кабакьулийхчин арс партиялувун кьамул ан къахьунтIиссарив куну, цIуххин. Та чIун цурдагу дия узбакIнал паммалуцIун къалмакъаллал, рушватирттал авазалул дуниял чялав-чялав тIутIи дурсса чIун. Танал най бунува ттухь увкуна гьарцагу рекомендациялух шаназарда къуруш дулун багьантIиссар куну, яни аьмну цинярдагу урчIазарда къуруш.
Нагу, туну, танахь миккува бувсъссия мукунсса кашилул заллу нава акъашиву, пенсиялия пенсиялийн ияннин ссавурданий яхъанахъисса бутта ушиву. Ча, та чIумалла хIасул хьуну дикIайва партиялувун уххан­ссаннухлугу лулттурасри ласласисса тагьар.

Хъиривгу буссар
Жаруллагь Керимов