Ца инсан ивкIунни
Октябрь зурул 16-нний Къарабудагъкантуллал райондалий, ссят 16.50 хьусса чIумуву, Ккурттайнная Урмав нанисса ххуллий ДТП хьуну дур.
«ВАЗ-2114» маркалул машиналул рульданух нанисса Лаващиял райондалиясса 20 шинавусса жагьил хьунив-ххуллийн увккун, машина щун бувну бур «Хондай-Солярис» машиналийн.
Ва ишираву «ВАЗ-2114» машиналий най бивкIсса Къуппиял шяравасса 49 шинавусса хъамитайпа бусса кIанай къуртал хьуну бур, вара шяравасса оьрмулул 48 шинавусса хъамитайпа ва «Хондай-Солярис» машиналуву най бивкIсса Лаващиял шяравасса 26 шинавусса хъамитайпа, цIунцIияртту хьуну, Лаващиял азарханалийн биян бувну бур.
Ва иширал хIакъираву материал цачIун дурну дур.
ХIарчIун ивкIун ур
Октябрь зурул 16-нний, ссят 21.55 хьусса чIумал, МахIачкъалалив, Буйнакскийл кIичIираву ГИБДД-лул ДПС-лул зузалтрал увгьуну ур 28 шинавусса жагьилсса адимина. Зерххуну диркIун, правагу дакъа дунура, хIангу хIарчIун, машина бачин бувну най ивкIун ур (ВАЗ-2110).
Ва иширал хIакъираву АьФ-лул УК-рал 267-мур статьялул 1-мур бутIуйн дагьайсса уголов дело сукку дурну дур.
Укунсса тахсиркаршиврухлу байсса яла кьянкьасса танмихI бур 2 шинай дуснакь аву.
Цурк бувну бур
Октябрь зурул 16-нний полициялул зузалтрал кIул бувну бур 24 шинавусса адиминал 35 шинавусса хъамитайпалучIату дарцушиву 78 азарда къурушрансса электричествалул кьай.
Цурк бувма увгьуну ур. Ва мукIру хьуну ур.
Инсантал оьрмурдацIа хьунни
Октябрь зурул 14-нний, ссят 18.25. хьусса чIумал «Кавказ» федерал ххуллий Дарбантуллал райондалийсса Рубас шяраваллил чIарав «Нива» машиналий нанисса 55 шинавусса адиминал машина, байгьин къавхьуну, бетондалул дайгьузандалийн щун бувну бур. Ва ишираву кIия инсан оьрмулуцIа хьуну ур: 36 шинавусса хъамитайпа бусса кIанай къуртал хьуну бур, щупир Дарбантуллал азарханалий накьлу хьуну ур. Машиналуву ивкIсса цамагу пассажир, цIунцIияртту хьуну, азарханалийн иян увну ур.
Лажин хIадур дурссар
Андриана Аьбдуллаевал
