[dropcap]О[/dropcap]ктябрьданул 8-нний Дагъусттаннал БакIчи Владимир Васильевлул дунни гьарца нюжмардий дайсса батIаву, муний гьуртту хьунни республикалул
властьрал законну дуккан даврил, биттур даврил ва муниципал органнал каялувчитал.
БатIаврий ххал бивгьусса масъаларттава яла агьаммур бия Аьрасатнал Федерациялул ХIукуматрал Председатель Дмитрий Медведевлул гьашину сентябрьданул 13-ннийсса хьунабакьаврий дурсса тапшур бавуртту бартдигьлагьаврил хIакъиравумур.
ДР-лул строительствалул ва коммунал хозяйствалул министр Малик Баглиевлул тIимунийн бувну, строительствалул ва ЖКХ-лул лагрулийсса тапшур бавуртту пландалий тIайлану най дур. ЦIанасса ппурттуву Дагъусттаннал минстройрал дуллай бур агьали щинал щаллу баврил объектирдал инвентаризация ва миннул цIанасса тагьарданул анализ.
ДР-лул дуккаврил ва элмулул министр Уммупазиль Оьмаровал бувсунни АьФ-лул Дуккаврил ва элмулул министерствалийн тIайла дурккун душиву, школарттай шанна чIумух дарсру дишаврил низам духлаган даву мурадрай аьркин дуван 9 млрд ва 250 млн. къурушрансса заявка
ДР-лул экономикалул министр ХIусман Хасбулатовлул бувсунни мигу, цаймигу заявкартту ххал диргьуну душиву АьФ-лул Экономикалул министерствалий, АьФ-лул Финансирттал министерствалий ми хъин чулий ккарккун душиву ва утти Аьрасатнал ХIукуматрай ххал дигьлай душиву.
ДР-лул транспортрал ва ххуллурдал хозяйствалул министр Ширухан ХIажимурадовлул тIимунийн бувну, цIанасса ппурттуву зий бур, Хасавюрт ва Дарбант шагьрурдавун къабувхнува, чIарах буккайсса ххуллурду бансса проектраха. Ми бан личIи дантIий дур 50 млрд. къурушрал.
БатIаврий ххал бивгьунни цаймигу масъалартту.
