Ларгсса ххуллункьини, октябрьданул 20-нний, Дагъусттаннал агрономиялул университетраву жула региондалийсса Халкьуннал фронтрал конгресс хьунни.

З.АьбдурахIманова
Ваний гьуртту хьунни респуб­ликалул цаппара министерстварттал, ведомстварттал каялувчитал, жяматийсса сакиншиннардал вакилтал ва муниципалитетирттаясса хъамал.
Конгресс бачин бувну ия АьФ-лул Госдумалул депутат, жула республикалийсса ОНФ-рал сопредседатель Умахан Умаханов. Шикку ххал бигьлагьисса агьамми суаллугу хас бувну бия Аьрасатнал Президентнал цала хъунмур ихтилатраву кIицI лавгун бивкIсса стратегиялул ма­съаларттан.

«Гьарца интту шай­сса ОНФ-рал конференциялийннин зунтIиссар вакилтал агьалинащал. Микку ххал бигьи­н­нин, халкьуннал чулухасса суаллащал ва масъаларттащал кIул увантIиссар респуб­ликалул бакIчигу»,-увкунни У.Умахановлул.
Конференциялул гьурттучитурал вичIи дирхьунни жучIара ОНФ зузиссаксса хIаллай ванил экспертътурал ва координатортурал дурсса давурттаясса ихтилатирттах. Республикалий ттинин Халкьуннал фронтрал щурущи дурсса «Карта убитых дорог», «Генеральная уборка», «Народная оценка качества», «За честные закупки», «Равные возможности детям» тIисса проектирдал хIакъиравусса давур­тту най диркIссар.

« Майрал указру» щаллу хьуншиврул хIукму бувну бивкIссар миннуха зун­сса хIукуматрал къуллугъирттал ялув жяматрал чулухасса ялувбацIаву дуллан. Сакин бувссар ацIния кIива тематикалул майдан. Миннул жаваблувшиннагу дирхьуссар рес­публикалий хъанахъисса ишир­ттах биччибакъулшиву дакъа­сса чантI увкусса инсантурай»,-кунни У.Умахановлул.
Конференциялий гьуртту хьусса ДР-лул кIулшивурттал ва элмулул министр Уммупазил Оьма­ровал кIицI лавгунни цу­ппа хIадурну бушиву Халкьуннал фронтращал цачIуну зун.

Ванил бусаврийну, «Дуккаву» тIисса нацпроектрал ацIва бутIувасса урчIуннивух Да­гъусттангу гьурттуну бусса бур. У.Оьмаровал маслихIат бунни общественниктурахь школар­ттай луттирду биял къахъана­хъаврил, учительтурал аттестация даврил, оьрчIан гъили дукра дулаврил, мюрщулт садикравун кьамул баврил хIакъиравусса масъаларттавух чялишсса гьур­ттушинна дуван, ми щаллу баврил хIакъиравусса механизмру цачIу ххал дигьин.
Ихтилатирттая махъгу Москавлив шинал ахирданий хьун­тIисса ОНФ-рал съездрайн тIай­ла буккантIисса делегатътал бувчIунни.