Президентнал ГрантрацIух Дагъусттаннай тIабиаьтрал гьайкаллаясса документал журалул киносурат хIадур дурну дур Дагъусттаннал элмийсса улчалахьхьултрал центрданул.
Ва центрданул председатель, продюсер ва сценарист, чичу Ислам МахIаммадовлул бувсунни 20 минутIрайсса ва киносурат, ингилис мазрайнгу таржума дурну, аьрасатнал ва дунияллул халкьуннал кинофестиваллайн тIайла дуккантIишиву.
П. Рамазанова
«Анжагъ хьхьирил ва зунттал цIаний Дагъусттаннайн туристал кIункIу буллалаву къатIайлассар, тIабиаьтрал хIикматру Дагъусттаннай чIяруссар, Аьрасатнал кьиблалул чулух Дагъусттан ца ляличIимур, хъамал ххирамур республикар. ЖучIава шинал лажиндарай бигьалаглан хъанантIиссар туристураща.
Дагъусттаннайн кIункIу хъанай бивкIссар чIявусса мусапиртал, художниктал, шаэртал ва чичулт», — тIий ур Ислам МахIаммадов.
Ва киносурат школарттай, интернетраву ва региондалул телеканаллайгу ккаккан дуллантIий бур, ваниву бувсун бур Сулакьрал каньондалия, Сарикъумрал бархандалия, Хунзахъиял паркрая ва цаймигу тIабиаьтрал кьиматрайсса гьайкаллая.
