Ларгсса нюжмардий ДР-лул кIулшивурттал ва элмулул министр Уммупазил Оьмарова хьунабавкьунни олимпий чемпион, Дагъусттан Республикалул чулухасса Госдумалул депутат, спортрал лайкь хьусса мастер Бувайсар Сайтиевлущал.
З. АьбдурахIманова
Ва хьунабакьаврил сиптагу Б.Сайтиевлул чулухасса хьуну дур.
«ОьрчIал спорт» тIисса проект «Единая Россия» партиялул ххал диргьусса ва ишла дан хIадур дуллалисса проект хъанахъиссар. Проектрал координаторну бур шамийла олимпий чемпион хьусса Госдумалул депутат Ирина Роднина. Проектрал жяматийсса советрал хъунаману ур Вячеслав Фетисов.
[dropcap]П[/dropcap]роектрал программалия ва агьамми мурадирттая буслай, Сайтиевлул кIицI бувунни бакьин бан бакIрайн лавсъсса, аьмну билаятрай щархъавусса школардацIунсса спортзаллал сияхIрай яла чIявуми Дагъусттаннайсса школартту бушиву.
Уммупазил Оьмаровалгу цила чулуха ххи бувунни цив хIадурну бушиву проектрацIун кабакьин.
«ЧIярур жучIара жура-журасса проектру. Чансса бакъар спортзаллу, школартту бакьин буллан бакIрайн ласун хIадурссагу. Зулмур проектрал тIурча, дур вайминнучIа дакъасса ца ляличIишиву –жяматрал чулухасса ялувбацIаву.
Му иш сававну жул чулухасса вихшалагу зуйн цIакь хъанай дур. ЦIубакIрайва кIулну хъиннихха чун циксса харж буккантIиссарив. Мисалдаран, гьашину хIукуматрал чулуха бувсса кумаграцIух жуща бювхъунни 41 воркаут-майдан бишин республикалул школарттал хIаятирттаву. Уттиния гихунмай республикалий укунсса давурттал ялув бацIансса Жяматийсса советру битавугу хъинну ххуйсса иширан ккаллийссар», — увкунни кIулшивуртту дулаврил министрнал.
Регионнайсса школарттачIасса спортзаллу бакьин буваву дакъасса, проектрал лагрулий школарттачIа буллай буссар стадионну, спортрал майданну ва мукунна шайссар спортрал журардал личIи-личIисса турнирду.
Цала ихтилатраву Б.Сайтиевлул кIицI лавгунни «Всемирные игры юных соотечественников» тIисса цIанилу шайсса хъуннасса турнир 2020 шинал Дагъусттаннай дуван хIарачат баврил ялув пикрилий ушиву.
