Ларгсса нюжмардий Дагъусттаннал паччахIлугърал техникийсса университетраву хьунни Дагъусттаннал ччуччиялул ва энергетикалул комплекс хьхьичIунмай баврин хас бувсса Стратегиялул сессия. Ва хьунни 2035 шинайн бияннинсса Дагъусттаннал социал-экономикалул багьу-бизу гьаз баврил проектрал лагрулий.
Имара Саидова
Сессиялул давриву гьуртту хьунни ДР-лул ХIукуматрал председательнал хъиривчу ХIажимахIаммад ХIусайнов, Дагъусттаннал промышленностьрал ва энергетикалул министр Сайгидпаша Умаханов, ДГТУ-лул ректор ТIагьир Исмяилов, властьрал органнал вакилтал, экспертътал ва ишбажаранчитал.
Вице-премьер ХIажимурад ХIусайновлул, сессиялул даву дайдихьлай, кIицI лавгунни Дагъусттаннай ччуччиялул ва энергетикалул комплекс ца яла агьаммур хъанахъишиву.
— Дагъусттаннал социал-экономика хьхьичIуннай даву мурадрайсса проектрал лагрулий ччуччиялул ва энергетикалул комплексрал масъалартту иширайну дузрайн буккан буллалисса тамансса давуртту дуссар дачин дурну. Кьамул дурссар ЖКХ-лул объектру ва цаймигу идарартту газрал щаллу буллалисса программа. Му бакъассагу, дачин дурну дуссар, нукIура дарцIуну диркIсса, «Артем-Дербент» (330 кВ бусса) линиялул даву. Мукунна дайдирхьуну дуссар «Махачкала – 330» подстанция цIу буккан буллалисса давурттугу, — увкунни ХIажимурад ХIусайновлул.
ХIакьинусса Дагъусттаннал ччуччиялул ва энергетикалул промышленностьрал отраслирдал тагьардания балжину бусласисса ихтилат бунни Сайгидпаша Умахановлулгу. Ванал бусаврийну, 2017 шинал газрал щаллу бувну бур 21 пункт. Ттинин агьали газрал щаллу бувну бур 69,8 % , 40% дух хьуну дур объектирдайсса газрал инфраструктура.
Сайгидпаша Умахановлул мукунма кIицI лавгунни электросетирдал комплексрал тагьар ххуйсса дакъашиву, 70-80-ку шиннардийра дурсса сетру лащинну душиву, махъсса 10-хъул шиннардий электроэнергия ишла баврил даража хъинну гьаз хьушиву, хаснува газ къабувцусса районнай, мунийн бувнугу хъунмурчIин кIинттул чIумал хъунмасса гуж багьлай бушиву электросетирдайн.
Сессиялий хьунни гидроэнергетика хьхьичIуннай даврин ва энергиялул цаймигу источникру цIубуккан баврин хас бувсса цаймигу ихтилатру.