[dropcap]С[/dropcap]ентябрьданул 9-нний ДР-лул Халкьуннал Мажлисрал депутатътурал увчIунни региондалул цIусса БакIчи. — Аьрасатнал Президентнал ккаккан увну ия 3 кандидат: Владимир Васильев, Камил Давдиев ва МахIмуд МахIмудов.
ЧIурду буллай бия кьюлтIну. БувчIавуртту дуван хьхьичI кандидатътурал махъругу лавхъунни цалла дуван дакIнийсса давурттал хIакъираву. Цалчин, махъ лавхъуна Дагъусттаннал БакIчинал кIанайма Владимир Васильевлул.
«Ттущава бюхъаймур банна дагъусттанлувтурал оьрмурду ххуй баврил цIаний», — увкунни ванал.
Владимир Васильевлул гьарза-гьартану бувсуна республикалий хъанахъисса иширттая, Дагъусттаннай коррупция духлаган даншиврул дуллалисса давурттая. Ттинин жущава бювхъунни агьали вихшала дишин буван ва ттинияр тихуннайгу республикалул маэшат гьаз бансса шартIру дузал дуван. МуницIунма уттигу жунма аьркинни тамансса захIматсса масъалартту дузрайн буккан буван. Каялувшиврул давуртту закондалул ххуллийн дуккан дуван аьркинну дур, халкь жура дуллалимуния рязину бикIаншиврул, тIайламур ххув хъанай бушиву чIалачIи баншиврул.
ЦIанасса ппурттуву жува талай буру коррупциялущал. ЖучIава зий бия генпрокуратуралул комиссия. Миннал дурсса давурттал хIасиллайну жавабрайн кIункIу увссар сайки 300 къуллугъчи. Федерал министерстварттаясса пишакартал кумаг буллай бур жула къуллугъчитурал ва хозяйстварттал каялувчитурал дуллалисса закон лиян давуртту духлаган дуван» — кунни ванал.
Мукунма ванал бувсунни управлениялул давурттай битансса зузалт хIадур буллай бушиву, ттиния тихунмай къуллугъирттай битлантIишиву конкурсрай ххув хьуми. Ихтилат къуртал хьуну махъ Владимир Васильевлул жавабру дуллунни депутатътурал буллусса суаллахьхьун.
[dropcap]Я[/dropcap]ла цалла программалул хIакъираву бувсунни «Справедливая Россия» партиялул отделениялул председатель, Халкьуннал Мажлисрал председательнал хъиривчу Камил Давдиевлул ва КПРФ-лул чулухасса кандидат, региондалул парламентрал вице-спикер МахIмуд МахIмудовлул. Яла ихтилатру бунни гьарца фракциялул чулухасса ца-ца вакилнал.
ЧIурду ккал дан личIи бувсса комиссиялул хIасиллайн бувну, 86-ннива 77 чIу буллуну, ххув хьунни Владимир Васильев.
Президентнал СКФО-лийсса вакил Александр Матовниковлул мунахь барча бунни къуллугъ. Мунал бувсунни цувагу, властьрал федерал органнугу хIадурну душиву бюхъайсса кумаг буван.
Цалвамур ихтилатраву Владимир Васильевлул бувсунни га кьини хьуну бушиву тарихравун ласунсса иш, ва му иширайну хъин чулийнмай баххана хьунтIий бушиву Дагъусттаннал инсантурал оьрмурду. «Гражданин, патриот ва хIаписар хIисаврай, на дакIнихтуну буручланна республикалул ва гьарца инсаннал мурадру. ДакI дарцIуну ура ва даврий ттущава зуйн чул бищун бюхъаншиврий. Жущава бюхъантIиссар чIярусса давуртту дуван жула агьалинал мурадирттал цIаний», — увкунни Владимир Васильевлул.
Гара кьини хьунни инаугурация, микку ДР-лул БакIчинал кьамул бунни хъагу.
«На хъа буллай ура чIявумиллатру бусса Дагъусттаннал халкьуннал къуллугърай ацIан, дуручлан Аьрасатнал Федерациялул Конституция, федерал Законну, Дагъусттан Республикалул Конституция, Дагъусттан Республикалул Законну, дуручлан инсаннал ва гражданиннал ихтиярду ва тархъаншивуртту. Дагъусттан Республикалул цашиву ва аьрщарал щаллушиву. ДакI марцIну биттур буллан ттуйва бивхьусса ДР-лул БакIчинал буржру. Хъа буллай ура!» — увкунни Васильевлул.
ХIадур бувссар ХI. Аьдиловлул
