[dropcap]М[/dropcap]ахIачкъала шагьрулул бакIчинал хъиривчу ХIаким Ашиковлул каялувшиндарай августрал 29-нний
МахIачкъала шагьрулул администрациялий хьунни шагьрулий «100 школа» проект щаллу даврин хас дурсса батIаву.
Мунивух гьуртту хьунни личIи-личIисса идарарттал вакилтал ва МахIачкъала шагьрулул школарттал ремонтран аьркинсса давурттацIун кабакьу буван хIадурсса инвестортал.
ХIаким Ашиковлул дакIнийн бувтунни МахIачкъала гьуртту хьушиву «100 школа» тIисса республикалул проектрал конкурсрай ва мунийн бувну хьушиву шагьрулул 41 школалий ремонтрал давуртту дувансса каши. Бувсунни цIу дагьаврийн къаршисса ва террорданиясса мюхчаншиву дуруччаврийн багьайсса масъалартту бушиву хIисавравун лавсун, конкурсрал хIасиллайн бувну кIунттихьхьун дуркIсса арцу тIайла дуллай бушиву ми ва цаппарасса цаймигу масъалартту щаллу баврийн.
[dropcap]Б[/dropcap]увсунни ялагу МахIачкъала шагьрулул школарттай чара бакъа бартдигьин аьркинсса давурттал лагру лахълай душиву сайки 87 миллион къурушрайн, миннува 51 миллион – республикалул бюджетрава, 20 миллион – спонсортурал, инвестортурал ва меценатътурал чулуха, 16 миллион – шагьрулул бюджетрава.
ДакIнийн бутан, «100 школа» проект щаллу дуллалиссар ДР-лул БакIчинал буржру чIумуйну биттур буллалисса Владимир Васильевлул тапшур баврийн бувну.
«100 школа» проектрал конкурсрай ххув хьусса школарттал сияхI кIул дан бюхъантIиссар шикку: htt://100schooI.е-dag.ru/perechеn-shkoI-proshеdshikh-konkursnyy-otbor.
Шиккува кIицI лаган, лакрал районнал школарттава ва сияхIрайн лавсун бур: Лакрал райондалий – ЧIурттащиял школа (30 оьрчIансса кIану бусса) ва Хьурттал школа (38 дуклаки оьрчIансса кIану бусса); Ккуллал райондалий – Ккуллал 1-мур школа (158 оьрчIансса) ва Хъусращиял школа (85 дуклаки оьрчIансса); ЦIуссалакрал райондалий – ДучIиннал школа (156 оьрчIансса) ва ТIюхчардал школа (320 оьрчIансса).
