ЦIусса дуккаврил шин вузирдал, техникумирттал, школарттал байранни. Яла-яларив, цалчин школалийн наниминнал. ТIутIал кацIругу канихьну, вас-ццахлийсса асардугу дакIурдиву гьанагьи бувну, бачай школарттайн цалчинми классирттавун наними.
П. Рамазанова
Гьашину Аьрасатнавусса школарттайн лавгссар аьмну 15,6 миллион оьрчIал. Дагъусттаннал хъуншагьрулул школарттайн (ми 60 бусса бур) гьашину лавгссар 83 азара дуклаки оьрчI, дукIунияр 5 азара ххишала. Цалчинми классирттавун лавгун бур 10 азарунниха ливчусса оьрчIру.
КIулшивурттал кьини гьашину ххуллункьинилийн тIайла дацIарчагу, шадлугърал линейкартту дунни сайки циняв школарттай. ОьрчIру барча буван бувкIунни шагьрулул администрациялул вакилтал ва цаймигу идарарттал къуллугъчитал. Му бакъассагу, цаппара школарттай ва кьини «Мой Дагестан» конкурсрай ххув хьуми хьунабавкьунни дуклаки оьрчIащал, бувсунни республикалул агьамсса къуллугъирттай зунсса даражалийн гьаз хьуншиврул цукунсса захIмат буллан аьркинссарив.
МахIачкъалаллал чIявусса школарттайсса учительтурал гьашину, «Оьрмулул тIутIив» тIисса акциялуцIун бавкьуну, нитти-буттахъал комитетирттан ччянива баян бунни, ца кацI тIутIал лавсун, яла тIутIах дулун най бивкIми арцу ихIсандалул давурттан харж даврицIун бакьлай бушиву. Масалдаран, укунмасса миннат бунни МахIачкъалаллал №30 лицейрал 8 «б» классрал хъунмур Лариса Шихбабаевалгу.
— Цуксса ттунна тIутIив ххиранугу, ва кIирисса чIумал ччяни зия хьунсса тIутIах арцу харж мадувари, ттун тIутIал ца кацIгу гьар цинявннал цIанияту, цIусса дуккаврил шиндайдихьулий нитти-буттахъал жипай укуннагу диялсса къия шай, ядувара зулла арцу зула оьрчIан харж дуван, тIутIах къадуллай, — баян бунни ванил нитти-буттахъал комитетрайн.
Щил ци учирчагу, чIявусса бур школарттай цалла даву ххирасса, давриву дакI дирхьуну зузисса педагогтал.
Дуккаврил шинал ахир дайдихьулияр ххарисса хьуннав оьрчIангу, учительтурангу, нитти-буттахъангу.
