[dropcap]С[/dropcap]ентябрьданул 7-нний Ма­хIач­къалалив М. Горькийл цIанийсса Оьруснал драмалул театрдануву хьунни Дагъус­ттаннал халкьуннал шаэр Расул ХIамзатов дунияллийн увккун 95 шин шаврин хас дурсса шадлугърайсса батIаву.

Гьарца шинал кунма, Расул ХIамзатовлул аьпалул ххатирданун, республикалийн вай гьантрай жула билаятрал регионная ва чил билаятирттая бувкIуна чIявусса бусравсса хъамал.
Хъунасса шаэрнал аьпалун дуллалисса батIавривух гьур­тту хьунни: АьФ-лул ФС-рал Федерациялул Советрал председательнал хъиривчу Илияс Оьмаханов, ДР-лул Халкьуннал Мажлисрал председатель Хизри Шихсаидов, ДР-лул ХIукуматрал председатель Артем Здунов, ДР-лул БакIчинал ва ХIукуматрал Администрациялул каялувчи Владимир Иванов, ДР-лул Халкьуннал Мажлисрал председательнал хъиривчу Елена Ельникова, Дагъусттаннал цалчинсса президент МухIу Аьлиев, Аьрасатнал Чичултрал союзрал председатель Николай Иванов ва цайми-цаймигу бусравсса хъамал.
Шаэрнал оьрмулиясса ва творчествалиясса ихтилатру бунни Хизри Шихсаидовлул, Николай Ивановлул, Владимир Бояриновлул, чIаххувсса регионнаясса ва дазул кьатIатусса хъамаллурал.
Ихтилатирттая махъ респуб­ликалул артистътурал ва творчествалул коллективирттал кка­ккан дунни хъуннасса концерт.

«КIяла кьурукьру» – цIунилгу дагъусттаннал ссавруннай

Ххуллункьини, сентябрьданул 8-нний, жулла респуб­ликалий хьунни Дунияллул халкьуннал дянивсса ХIамзатовлул ХХХII литературалул фестиваль «КIяла кьурукьру».
Ва кьини кIюрххил, чIярусса шиннардил мутталий цIакь хьу­сса аьдатрайн бувну, республикалул къуллугъчитал ва бусрав­сса хъамал бивунни Тарки-Зун­ттул ухнилусса шаэрнал гьа­ттайн. Дагъусттан Республикалул бакIчи Владимир Васильевлул, АьФ-лул ФС-рал Федерациялул Советрал председательнал хъиривчу Илияс Оьмахановлул, ДР-лул Халкьуннал Мажлисрал председатель Хизри Шихсаидовлул, ДР-лул ХIукуматрал председатель Артем Здуновлул, ДР-лул БакIчинал ва ХIукуматрал Администрациялул каялувчи Владимир Ивановлул, Дагъус­ттан Республикалул ХIукуматрал председательнал цалчинма хъиривчу Анатолий Карибовлул, ДР-лул культуралул министрнал буржру чIумуйну биттур буллалисса Зарема Буттаевал, респуб­ликалул хъун шагьрулул каялувшиндарал вакилтурал, Расул ХIамзатовлул гъан-маччанал ва дустурал шаэрнал гьаттай дирхьунни тIутIив.

— Цуксса хIайпнугу, укун хъунасса инсаннал чIарав ялапар хъанансса, мунащал хIала-гьурттуну икIансса, шиккун бавтIсса чIявуминнал куннасса, хIалу ттул дакъая. Амма ттуйн, махъсса цайминнайн кунма, мунал творчествалул хъунма­сса асар биян бувссар. Хаснува хIакьину, нава Дагъусттаннай зузисса чIумал, ттун дурчIлай дур ва инсаннал бюхттулшиву: философ, политик, шаэр хIисаврай, ванан кIулну бивкIун бур жула ялун бучIантIимур ва хIарачат буллай ивкIун ур Да­гъусттаннал никирттан духIан багьсса захIматшивурттая инсантал байщун бан, — увкунни В. Васильевлул.

Шаэрнал душнил СалихIат ХIамзатовал барчаллагь увкунни цинявннахьвагу, цила буттаясса аьпа ябуллай тIий.
Муния махъ бавтIми М. Горькийл цIанийсса Оьруснал драмалул театрданул чIарав шаэрнан дацIан дурсса гьайкалдануцI тIу­тIив дишин лавгунни.
«КIяла кьурукьру» фестиваль шадлугърал тагьарданий тIитIлатIисса батIаву хьунни Лениннул комсомолданул паркираву. БавтIминнал хьхьичI ихтилат буллай, Анатолий Карибовлул кIицI лавгунни шаэрнал аьпалул гьантри кIура баяйшиву дунияллул халкьуннал лагрулий­сса хъуннасса литературалул байрандалийн.
— Зувинния лирчусса шиннардил мутталий гьарца ссу­ттил шай «КIяла кьурукьру» фестиваль. Цува Расул ва фестиваль дуллай айивхьуна, дяъвилул майданнай жанну дуллуминнал аьпалунсса даву хIисаврай. Мунищала архIал ва хъанай дур литературалул, шеърилугърал байрангу. Жула Расул, хъуна­сса шаэр акъассагу, ия оьрмулух эшкьи хьусса бюхттулсса гуманистгу, гьартасса дакIнил заллугу. «Кьурукьру» хъанахъиссар оьрмулул гимн, цил бивкIу бакъасса ххуттардиву хъинсса бучIантIимунийнсса хьул-умуд бусса, — куна ванал.
Гихунмай махъру лавхъунни ДР-лул Чичултрал союзрал председатель МахIаммад АхIмадовлул, Аьрасатнал Чичултрал союзрал председатель Николай Ивановлул ва мукунма цайминналгу.
Ахирданий МахIачкъала шагьрулул оьрчIал искусствардал школардайн заназиминнал бавтIминнан ккаккан бунни «КIяла кьурукьру» тIисса композиция. Фестиваль къуртал хьунни гьаваллавун кIяла шарду итабакьаврийну.

«Жула Расул»

«Жула Расул» тIисса цIа­ни­лусса вечер хьунни Поэзиялул театрдануву. Мунивух гьуртту хьунни шаэртал, чичулт, таржумачитал, «КIяла кьурукьру» тIисса ХХХII фестивальданул бусравсса хъамал. Миннал бувккунни шаэрнал шеърирду, кIибавчIунни Да­гъусттаннайнсса аьрххилул цайнма биян бувсса асарду. ДР-лул культуралул министрнал буржру чIумуйну биттур буллалисса Зарема Буттаеван УзбакIнал Чичултрал союзрал вакил Минхожиттин Мирзонал ва Италиянал дунияллул халкьуннал дянив­сса «Парнас» тIисса цIанилусса конкурсрал сакиншинначи Ла Веккял дуллунни наградар­тту ва хъамакъабитулунсса бахшишру.

«Аьрасатнал ссавнийсса кьурукьру»

Расул ХIамзатовлун 95 шин шаврин хасъсса республикалул патриот балайрдал «Аьрасатнал ялувсса кьурукьру» («Журавли над Россией») тIисса фестиваль хьунни МахIачкъалалив Оьруснал театрданул хьхьичIсса майданнив. Мунил сакиншинначитал бия ДР-лул Культуралул министерство ва Республикалул Халкьуннал творчествалул къа­тта, ДР-лул КIулшиву дулаврил ва элмулул министерствалул гьурттушиндарайну.
Мунивух гьуртту хьунни республикалул районная ва шагьрурдая бувкIсса творчествалул коллективру, цивппалусса къавтIалт ва балайчитал, мукунма ДГУ-лул ва ДГПУ-лул «Студентътурал инт» тIисса шадлугърал язисса гьурттучитал.
Театрданул фойераву дия Дизайнрал, экономикалул ва правалул техникумрал студентътурал, МахIачкъала шагьрулул Культуралул управлениялул ОьрчIал художествалул школалул оьрчIал дирхьусса суратир­ттал выставка.

Амин Чутуевлул ларсъсса Расул ХIамзатовлул суратру

Дусшиврул къатлуву хьунни Расул ХIамзатовлул 95 шинал юбилейран хас дурсса суратирттал выставка. Мунивух гьуртту хьунни республикалул министерстварттал, жяматий­сса суккушиннардал вакилтал, П. ХIамзатовал цIанийсса ДМИИ-лул директор – шаэрнал душ СалихIат ХIамзатова.
Выставкалий дирхьуну дур шаэрнал оьрмулул личIи-ли­чIисса шиннардийсса 14 сурат. Миннул чIяруминнул авторгу ур Амин Чутуев.
Выставка лахъи лагантIиссар октябрьданул ахирданийннин.

«Расуллул кьурукьру»

«Расуллул кьурукьру» тIи­сса цIанилусса яруннал чаннал ссуссукьуминнал фестиваль хьунни МахIачкъалалив, «Дельфин» тIисса бигьалагай базалий.
Фестиваль сакин дурну дия ВОС-рал Республикалул отделениялул, яруннин чани бакъаминнал Спортрал федерациялул Дагъусттанналмур отделениялул ва Республикалул Халкьуннал творчествалул къатлул.
Фестивальданий гьуртту хьун «Дельфин» цIанилусса бигьалагай базалийн, хьхьирил зуманив, бавтIун бия ВОС-рал республикалул районнайсса организациярттаясса ва МахIачкъалалиясса творчествалул коллективру ва таксса балайчитал. Фестивальданул программалий бия балайрду, назмурду, хъярчийсса сценкартту. Хъунасса шаэрнан 95 шин шаврин хас дурсса фестиваль хьунни лайкьсса даражалий.