Ларгсса нюжмар жулла республикалий дакIний лирчIунни агьамсса иширттайну. ДакIний личIансса ва агьалинал багьу-бизу къулай баву мурадрайсса хьунни август зурул 

24-нний Дагъус­ттаннал паччахIлугърал технический университетраву хьусса «Инсаннал капитал» цIанилусса 10-мур Стратегиялул сессия.

---

Имара Саидова
[dropcap]Ш[/dropcap]икку гьуртту хьунни ДР-лул ХIукуматрал председательнал I-ма хъиривчу Анатолий Карибов, ДР-лул кIулшивуртту дулаврил ва элмулул министр Уммупазил Оьмарова, ДР-лул культуралул министр Зарема Буттаева, ДГТУ-лул ректор ТIагьир Исмяилов, министерстварттал ва идарарттал каялувчитал, экспертътал.
Сессиялул даву дайдихьлахьисса ихтилат буллай, Анатолий Карибовлул кIицI лавгунни, «Инсаннал капитал» проектрал мурад хъанахъишиву кIулшиву дулаврил, цIуллу-сагъшиву дуру­ччаврил даража гьаз баву, жагьил­сса ник жяматрал ва политикалул иширттавух хIала дизан даву.

— ХIакьину республикалий захIматрал пишардай зунсса кадрарду ва дянивсса даражалул пишакартал хIадур буллай буссар 70-ннийн бивсса кIулши­вуртту дулаврил идарарттай. Миллатирттал дянивсса «Жагьилсса пишакартурал» чемпионатрай 7 журалул пишардал усттаршиву ккаккан давриву гьуртту хьуссар Дагъусттаннаясса жагьилтал. Жула респуб­ликалий захIматрал пишардал усттаршиву ккаккан дуллалисса «Абилимпикс» цIанилусса бяст-ччаллу машгьур буллай буссар цIуллу-сагъшиврул ссуссукьушиву дусса оьрчIал дянивгу, — увкунни Карибовлул.

Мукунма ванал кIицI лавгунни, республикалий дакьаву, аслахIшиву цIакь даву мурадрай, хьхьичIун лавсъсса масъаларттугу. Цала ихтилатраву Карибовлул яла чIурчIав дурунни жагьилтурал политика цIу дуккан ва хьхьичIуннай даншиврул дузал дан аьркиншиву цинярда шартIру.
Мероприятиялий хьунни жагьилсса ник терроризмалул ва экстремизмалул иширттая дуруччаву мурадрайсса, диндалун, физкультуралун ва спортран хас бувсса мюнпатсса ихтилатругу.
Ихтилатирттал хъирив се­ссиялул гьурттучитурал даву дарчIунни личIи-личIисса проектру ва пикрирду бусласи­сса группардайх. Шикку кьамул бувсса хIукмурду ласунтIиссар 2035 шинайн бияннинсса респуб­ликалул социал ва экономикалул ахIвал-хIал къулай баву мурад­райсса программалийн.