Август зурул 25-нний Дагъусттаннал цIуллушиву дуруччаврил министр Жамалуттин ХIажиибрагьимов увкIун ия Ккуллал райондалийн.
[dropcap]В[/dropcap]анал га кьини кьамул увна 11 инсан. Вайннава чIявуми бия цIуллушиву дуруччаврил пишакартал. Вайннал министрнал хьхьичI гьаз бувна цала даврицIун бавхIусса личIи-личIисса суаллу. Миннувух бия: даврий бикIан багьайсса чIумуяр ххишала зузийни булайсса харжирал, шяраваллавусса цаппара ФАП-ру бакьин буван багьлай бушиврул, оьрчIан дулайсса дукиялул, льготниктуран итабакьайсса дарурттал ва цаймигу масъалартту.
Хьунабакьин бувкIминнал министрнахь тавакъю бувна (хIатта вай ишру ванал даврийн багьайсса бакъахьурчагу) «Мамраш-Ташкапур- Араканский мост» тIисса ххуллул бутIану хъанахъисса ЯтIувахъаллил ххуллу ва Вихьлив буллай бачIи ливчIсса школа къуртал бувансса арцу итадакьаврицIун кабакьаву бува куну.
Цахьхьунма буллусса суаллахьхьун министрнал гьарза-гьартасса жавабругу дуллуна. КIицI бувсса тавакъюрдал ялувгу кабакьу бансса махъ буллуна.
Инсантал кьамул бувну махъ Жамалуттин ХIажиибрагьимов Ккуллал райондалул азарханалул ялтту увккуна.
