Август зурул 28-нний, тталаткьини, МахIачкъалалий хьунни каялувчитурал кадрарду язи бугьлагьисса «Ттул Дагъусттан» конкурсрал финал.
6000-нния ливчусса инсантал гьуртту хъанай бивкIсса конкурсрай финалданувун увккун ия 161 инсан. Вайннава увчIусса 50 инсан кьамул увантIиссар Республикалул кадрардал резерврайн.
[dropcap]Р[/dropcap]егион хьхьичIуннай даву мурадрайсса «Ттул Дагъусттан» конкурс дуллай сукку хьуссия, Дагъусттаннал БакIчи Владимир Васильевлул тIалавшиндарайн бувну, ва проектрал чIаравгу бавцIуссар АНО «Россия – страна возможностей».
Республикалийн конкурсрал давривух гьурттушинна дан бувкIсса бусравсса хъамаллуравух бия: АьФ-лул Президентнал Администрациялул каялувчинал 1-ма хъиривчу Сергей Кириенко, СКФО-райсса АьФ-лул Президентнал вакил Александр Матовников, АьФ-лул строительствалул ва ЖКХ-лул министр Владимир Якушев, АьФ-лул энергетикалул министрнал хъиривчу, «Аьрасатнал лидертал» тIисса конкурсрай ххув хьусса Павел Сорокин, «Россия – страна возможностей» АНО-рал директор Алексей Комиссаров.
Мукунма ва кьини журналистуращал хьунабавкьунни Дагъусттаннал Республикалул БакIчинал бигарду биттур буллалисса Владимир Васильев, Республикалул ХIукуматрал председатель Артем Здунов, ДГУ-лул ректор Муртазяли Рабаданов, ДГУНХ-рал ректор ЯхIия Бучаев ва цаймигу.
Дагъусттаннал бакIчинал кIицI лавгунни ва проектрал кумаграйну цума-цагу пишакарнаща бюхъантIишиву, цала аькьлу-кIулшивуртту ккаккан дурну, республикалун цивппа тIалавну бушиву исват бан.
Конкурсрал гьурттучитал барча буллай, Сергей Кириенкол дакIнийн бувтунни АьФ-лул Президент Владимир Путиннул тIалавшиндарайн бувну щалагу Аьрасатнал конкурс баян бувну бивкIшиву ва му конкурсрай гьарцагу аьрасатлувнахьхьун цала бюхъу ва гьунар ккаккан бувансса сант дуллуну диркIшиву. Ванал бувсунни ва конкурсрайгу яла итххявхми, куртIсса кIулшивуртту ва даврил опыт буми профессионалтал язи бувгьушиву.
— МахIаттал хьунсса иш хьунни конкурсрайн кьамул бувсса 200 азаруннава 1500 аьрза Дагъусттанная бушивугу. Ва конкурсрай ххув хьуминнан бувссар пишалул даража гьаз баврин кабакьу буллалисса арцуйнусса кумагру, — увкунни Кириенкол.
Ванал мукунма бувсунни «Ттул Дагъусттан» конкурсрал финалданийн увксса шама инсаннал гьурттушинна дантIишиву сентябрь зурул 11-13-нний Владивостокрай хьунтIисса Экономикалул форумрал давривух. Ва форумрай гьуртту хьунтIиссар АьФ-лул Президент Владимир Путингу.
Владимир Матовниковлул, гьурттучитал барча буллай, кIицI лавгунни 6000-нния ливчусса инсантал гьуртту хьусса конкурсрал хIасиллу ларайсса душиву.
Владимир Васильевлул цала ихтилатраву чIурчIав дурунни «Ттул Дагъусттан» проект хIукуматрал даража гьаз буллалисса ца яла хьхьичIунмур хъанахъишиву.
— Вай гьантрай жува, хIасиллу дуллай, язи бугьлай буру яла гьунар ххими, кIулшивуртту куртIми, каялувчинал даврил опыт буми пишакартал. Ва конкурсрай гьуртту хьусса инсантурал сияхIрал тасттикь бунни укунсса давуртту тIалавну душиву. Проектрал агьаммур мураднугу хъанахъиссар агьалинал ахIвал-хIал къулай баву, республика хьхьичIуннай хъит учин даву, экономикалул ва социал ишру бачин баву. КIицI лаган ччай ура конкурсраву гьуртту хъанахъиминнан исват хьушиву цала гьунарданийну хъунисса къуллугъирттай зун кьамул байшиву. Конкурсрал даву марцIну ва тIайлану дачин даврил ялув бавцIуну бивкIссар федерал властьрал вакилталгу. Июль зуруй Владимир Путиннущал хьусса хьунабакьаврий на баян бувссия республикалий дачин дурсса кадрардал даврил конкурсрая. Конкурсрал даврил методика ва тестру сакин баврил давриха зий буссия яла цIанихми пишакартал , — увкунни Дагъусттаннал БакIчинал.
Муния махъ хьуна федерал ва республикалул СМИ-лущалсса пресс-конференция.
ХIадур бувссар
Имара Саидовал
