ЧIяруя ва ларгсса гъин­ттул Лаккуй шадлугъру ва байранну. Гъумук, шагьра-ххуллийгу кув шяраваллил кьинирдайн нанисса хьунабакьайва, кувгу – цалла-цалла щархъаву дуллалисса давурттавух гьур­тту хьун нанисса. Мукьархъиял махIлалийсса КIамахъаллал жяматрангу гьашинусса гъин­тнил махъва-махъмур барз хьунни щарнил тарихравун багьан­сса.

---

Залму АьбдурахIманова
ДакI ххари хъанай дия, школа лавкьуну махъ, пахъ дагьсса КIамахъаллал шяравалу оьрчIал чIурдал ларсун най чIалай. Гьарманал хIарачат бувну бия хьхьичIва-хьхьичI буттал шяравун цащала цала оьрчIругу буцин.

Хъамакъаритансса ва гьарнал дакIурдиву личIансса ххаришивугу дархIусса дия шяраву мизит тIитIаврицIун. ЛачI­­лачIисса гъаралунних, захI­матсса ххуллурдах ва манзилданул лахъишиврух къабурувгун, шиккун, лагма щархъая бакъасса, МахIачкъалалиясса, Къизилюртлиясса, Гъумучату­сса, чIаххуврайсса яруссаннал Щангъи-Щитлиясса халкьгума бувкIун бия. Хъамаллуравух бия республикалул ДУМД-рал вакилталгу. Миннавух ия Да­гъусттаннал муфтийнал цалчинма хъиривчу Аьвдуллагь Аждималлаев, централ округрайсса муфтийнал вакил Илияс Умалатов, муфтиятрал дуккаврил отделданул хъунама МахIаммад Ссаламов, Лакрал райондалул имам Шихмурад ХIажимурадов ва Гъумучиял Хъун мизитрал имам МахIаммад-Маннар Бариев ва цаймигу. Лакрал райондалул бакIчинал цIания жямат барча бан увкIун ия ванал хъиривчу Юсуп Рамазанов.

Мизит тIитIаврин хасъсса мажлис байбишин хьхьичI хIурматлувсса хъамаллурал, жяматравух чакгу бувну, хъун да­къасса мавлуд дурккуна.
Мажлис бачин бувну ия щарнил давурттавух мудангу гьур­ттусса жагьилсса ишбажаранчи, жулла республикалий парапланеристътурал цалчин­сса клуб сакин бувсса Марсел МахIаммадов.

[dropcap]М[/dropcap]изитрацIун дархIусса давурттал бакIщаращуй ивкIсса ва гьашину майрай жагьилсса оьрмулий аьпалухьхьун лавгсса Айдамир Жабраиловгу дакIнийн увтун, циняв барчагу бувну, гьарнайн жяматрал чулухасса барчаллагь баян бувна. Хаснува хъунмасса барчаллагь увкуна, хьхьу-кьини къакуну, мизитраха зий ивкIсса ва даврил бакIчишиву дурсса ХIажиаьлиев Юсуплухь, Маммаев Аьлихь, ХIабибуллаев Мяъсудлухь ва МахIаммадов ХIажиявлухь.
Хъирив махъ лавхъуна Ма­хIам­­мад Ссаламовлул.
-Шяраву мизит баврицIун цIулаган аьркинссар щархъурду ва кIункIу хьун аьркин­ссар жяматрал жагьи-жугьулт. КIа­­махъаллал шяравугу мукун хьунтIишиврийн щак бакъар. Дулуннав зухьхьун Аллагьнал цIаний давуртту дуллансса тавпикь ва каши,- увкуна ванал.

[dropcap]Р[/dropcap]айондалул бакIчинал цIа­ниясса ихтилат бувна Юсуп Рамазановлул. Агьамсса мажлисрай гьуртту хьун бувкIсса ДР-лул муфтиятрал вакилтурахь барчаллагь куна мунал.
Жяматрал чулухасса барчаллагьрал махъру лавхъуна Юсуп ХIажиаьлиевлул, Халид Аьбдуллаевлул, Ссалам МахIаммадовлул, Шагьрузат ХIажимиевал, Шамсият ХIажиаьлиевал, БатIа Ма­хIаммадовал, Басират Маммаевал, Башир Камаловлул.

Хъунмур никирал бусавур­ттайн бувну, ва мизит КIама­хъаллал жяматрал бувну бивкIун бур ттуршрахъул шиннардил хьхьичIва –щарнил дязанний. ЦIубакIрай ва бивкIун бур 50 инсан лагайсса, мизитрал ма­гъуяр лахъ бакъасса минарагу бу­сса. Цаппара шиннардива, щаргу хъунна хъанай, щарнил хъуни арамтурал хIукму бувну бур мизит гьарта-гьарза бан. Та чIумал КIамахъалив аьрава лагай­сса ххуллугума бивкIун бакъар. Гъумучату ницай дахIай кIира аьравагу дучIан дурну, миннуй архсса ратIату чартту ххилай, шайнал шаймур буллай, мизитрал чIиртту бацIан бувну бур. Чарил даву дангу цIа ларгсса Мияйннал усттартал бучIан бувну бивкIун бур. Миннан кумагран ирглий гьарца тухумраясса ца-ца адаминагу уккай­сса ивкIун ур. ХIисав бувну, ми ца 108-110 шинал хьхьичIсса ишру хъанай бур.
Мизитрал махъа-махъсса дивирнугу ивкIун ур Даудхъал тухумраясса МахIаммад тIисса адамина. Ганаяр хьхьичI тIурча, дивирну ивкIун ур аьраб мазрай дурккусса Щайхаьли тIисса шяравучу.

[dropcap]С[/dropcap]овет хIукумат дучIаврищал, МахIаммад-дивирдуща «чIугу» зевххуну, мизитрая колхозрал кьай дишай склад бувну бур. Колхозирттал заманнай склад­рай бакI-магъ дуллалиманал бурж бивкIун бур магъуя марххала букьангу, гъаргъ-лирмуний мяр-мах рищунгу. Махъсса шиннардий мизитрал магъигу вив дагьну, кIантту-кIанттурдай чIирттугу лекьлай сукку хьуну буссия. Шагьрурдай яхъанай бунугу, буттал миналийра дакIру лирчIсса КIамахъаллал чиваркIуннал, цачIун хьуну, вана утти мизит цIубуккан бувунни. Кувннал чIиртту, кувннал муххал магъи, кувннал вихсса давуртту дурну, жяматрал шайнал шайсса кумаграцIух цIу був­ссар Заннал къатта. БухкIуллул кIивагу чулух бур щинну дурцу­сса хIавзру бувну. Мизит цуппагу вих марцIсса тIаннул бавкьуну, чIирттай утти­заманнул чирахъругу лавхъун бур.

[dropcap]Х[/dropcap]ъиривмур кьини КIама­хъаллал шяраваллил кьинигу кIицI ларгуна ххуй-хъинсса даражалий.