Дайдирхьунни гьашинусса школардайсса дуккаврил шин. Сентябрь зурул цалчинмур кьини, цалчинмур классравун цалчин дуклан бувкIсса оьрчIал байрандалул кьинидакъагу, хъанай дур хъиривми классирттал оьрчIал цала кIулшиву гьаз дуллай байбишаврил кьинигу. Гьай-гьай, жула оьрчIан кIулшиву дуллалисса учительтуралгу байранни ва.
Ккуллал райондалий бур 14 школа. Вайннувату 8 школа бур дянивсса кIулшиву дулайсса, 5 – гьанусса кIулшиву дулайсса, 1 – байбихьулул школа. Вай школарттай ларгсса дуккаврил шинал дуклай бивкIун бур 825 оьрчI. Школа бакъасса шяравалуну дур Ссухъиящиял шяравалу. Гьашинусса дуккаврил шинал дайдихьулий цумур школалий цими оьрчI уссарив цалсса ттуща кIул бан къавхьунни, УО-лул каялувчи аххана шаврицIун бавхIуну. Му кIул хьунтIиссар кунни сентябрь зурул 10-нния махъ.
Ххуй-ххуйсса яннардугу ларххун, ва кьини школалийн бучIай оьрчIру, учительтал, нитти-буттахъул. Муна мукунсса байрандалул кьинину хьуна Вихьуллал школалийгу.
Школалул директорнал бувсуна аьмну школалий дуклай бушиву 80-нничIан бивсса оьрчIру. Гьашину цалчинмур классравун увкIун ур 5 оьрчI. Миннал учительнугу бур Чупанова ПатIима Зайнуттиннул душ.
[dropcap]О[/dropcap]ьрчIру школалул хIаятраву линейкалий бацIайхту, дуккаврил шин дайдишаврин хас бувсса мажлис тIивтIуна школалул директорнал хъиривмур МахIаммадова Жинасатлул. ОьрчIахь ва цинявннахь дуккаврил шин барча дуруна райондалул администрациялул зузала МахIаммад ХIусайновлул, Вихьуллал администрациялул бакIчи СайкIу Сулаймановлул, Вихьуллал Культуралул къатлул директор Рукьижат ХIасанхIусайновал ва цайминнал.
Школалул директорнал ларгсса шинал дуккавриву ккаккан дурсса хьхьичIуннайшивурттахлу оьрчIан дуллуна грамотартту. Ганияр махъ циняв оьрчIру бувххуна цала-цала классирттавун ва цалчинмур дарсну хьуна «Аьрасатнал кьини» тIисса дарс.
