Дагъусттаннал Муфтиятрайн лабизай чIявусса инсантал, машинарттал аварияртту хьусса ппурттуву ми авариярттаву ливтIуцириннал гъанми дакьил бувара,
энад багьминнал дянив маслихIат бувара тIий.
Гьашину арулва зурул мутталий Муфтиятрал Дакьил бувай отделданул (Отдел примерения) ххал бивгьуну бур ДТП сававсса 100 иш, миннувугу 31 иш бур инсан дунияллия лавгсса. ЧIявумур чIумал отделдануща, маслихIатрай цавай гайминнал ялтту бувчIун дакьил буван шайсса бур кIивайвагу. Мукунма кIани-кIанттурдай имамтурайнгу буклай бур, ссивцIу багьсса кIанттурду буну. Аварияртту чIяру хьусса тагьар чIалай, республикалул муфтият оьвтIий бур щупиртурайн, агьалинал рахIатшиврул ва мюхчаншиврул цIаний ссавурданий ва транспорт ссур къадуллай зун. Исламрал диндалийн бувну, водительтурал ва агьалинал дуручлан аьркинссар ххуллурдайсса низам.
Хасъсса школарттай ххуйну машина бачин бан къалавхьхьуну къабучIиссар водительнал права ласлан. Ххуллийсса низам зия дуваву, бакьин къабувсса машиналий щяикIаву ягу увччу хьуну рульданух щяикIаву бунагьссар. Инсантал чулахъ бувну, ягу лива-ливтIуну, хъунмасса бунагьрахьхьун къаагьлан ххуйну пикри буван аьркинни рульданух щяикIаннин.
Муфтиятрал тавакъю бунни кказитрайхчингу баян буван: авариялий тахсир хьуманал чара бакъа, цIунцIия хьума хъин хьуннин, мунан аьркинмуних харж бишин аьркинссар куну. Агар инсан ивчIарча, тахсир хьуманай бурж бишин кIива зуруйсса зума дугьан ва ивкIуманал маччахъал тIалавшинна щаллу дуван. Агарда тахсир бума ивчIарчагу, му сававну зарал бивсса инсантурал тIалавшиннарду щаллу дуван ялувссар ивкIуманал гъан-маччанай.
Агана авариялий щил-дунугу хъуслин зарал хьурча, мигу буржлувссар лахъаву дуван.
Ххуллийх наниманаягур тIалавшинна дусса, агар му сававну ДТП хьуну духьурча. Ккаккан бувсса кIанай бакъа, ххуллул тийн-шийн лахълан къабучIиссар.
Аьлимтал ва имамтал ДТП-лул балаллахьхьун биривми дакьил бувавриву гьуртту къашайссар, багьайкун тахсир цуманай хьуну бурив исват къабувссаксса.
Дагъусттаннал ГИБДД-лул хIасиллайн бувну, гьашину республикалий уттинин 954 ДТП хьуну дур, 213 инсан ивкIуну ур ва 1479 инсаннан цIунцIияртту хьуну дур. Укун пашмансса хIасиллу дур, пикри бувара!
П. Рамазанова
