[dropcap]А[/dropcap]ьрасатнал Президент В. Путиннул тапшур бувну, федерал бюджетрава Дагъусттаннан 350 миллион булун кунни республикалул онкологиялул диспансерданул поликлиника бувну къуртал буван. Ва ххарисса хавар бувсунни Дагъусттаннал БакIчинал кIанттайсса В. Васильевлул ирглийсса батIаврий.
П. Рамазанова
ЦIусса поликлиникалул чарабакъашиву хIисавравун ларсун, 10 шинал хьхьичIва буллай байбивхьуну бур му поликлиника,МахIачкъалалив, Ахъушинскийл цIанийсса кIичIиравусса диспансерданул чIарав. Амма даву 10 шинай лахъи ларгун дур.
Хъунисса учирду дикIай мудангу бухмур поликлиникалий, ласу-ка бувхIуну личIлачIисса къашайшалтгу республикалул кьатIувсса азарханардайн най бур. Ххуйсса поликлиника бакъашиврул щавщи биллай бур диспансерданул даврийнгу. Къашайшалт чIумуй азарханалий уттубишин бувансса сант дакъар. Аьмну Аьрасатнавусса онкодиспансердайнияр шамлий чанну бур Дагъусттанналмур азарханалийсса кIантту.
ЦIуллушиву дуруччаврил министерствалул хIасиллайн бувнурив, Дагъусттаннай ялу-ялун чIяву хъанай бусса бур ракрал цIуцIаврил бувгьуми, махъсса 10 шинал мутталий 17% чIяву хьуну бур. Вара чIумул мутталий ракрал цIуцIаврил бувгьуми литIлатIавугу гьаз хьуну дур сайки 5% (4,7%). Ва тагьар чIалай, министр Жамалуттин ХIажиибрагьимовлул маслихIат бувну бур ца сменалий 200 къашайшала кьамул увансса поликлиникагу, 40 койка-кIану бусса стационаргу бувну къуртал бувансса чаран лякъин.
ЦIусса поликлиника ва шинал ахирданийннин бувну къуртал бувантIий бур.
Онкологиялул центр дузал бувантIий бур ттизаманнул оборудованиялулгу: лучевая диагностикалул, эндоскопиялул техникалул, магнитно-резонанснай томографрал. Мукунма цIакь дувантIий бур «электрон регистратура», яъни интернетрал кумаграйну хIакинтурачIан чичлансса хIаллихшин.
Владимир Васильевлул чIурчIав дунни региондалий онкологиялул цIусса центр буваврийну ва аралувусса даву ххуй хьун аьркиншиву ва, яла-яларив, медициналул зузалт инсантурай цIими буну, тIайлану зун аьркиншиву.
